riwayat ki taKHliq

mere naġhme to rivāyāt ke pāband nahīñ

tū ne shāyad yahī samjhā thā nadīm

tū ne samjhā thā ki shabnam kī ḳhunuk-tābī se

maiñ tirā rañg mahal aur sajā hī dūñgā

tū ne samjhā thā ki pīpal ke ghane saa.e meñ

apne college ke hī rūmān sunā.ūñgā tujhe

ek rañgīn sī titlī ke paroñ ke qisse

kuchh sehr-kār nigāhoñ ke bayāñ

kuchh javāñ saal adāoñ ke nishāñ

kuchh karūñgā lab o ruḳhsār kī bāteñ tujh se

tū ne shāyad yahī samjhā thā nadīm

tū ne ye kyuuñ nahīñ samjhā ki mere afsāne

tanz ban kar tirī sāñsoñ se ulajh jā.eñge

zindagī chāñd kī ThanDak hī nahīñ

zindagī garm mashīnoñ kā dhuāñ bhī hai nadīm

is dhueñ meñ mujhe zanjīr nazar aatī hai

mujh ko ḳhud terī hī tasvīr nazar aatī hai

ġhaur se dekh zarā dekh to le

tujh ko Dar hai tirī tahzīb na jal jaa.e kahīñ

mujh ko Dar hai ye rivāyāt na jal jaa.eñ kahīñ

phir ik din usī ḳhākistar se

ik na.e ahd kī ta.amīr to ho jā.egī

ek insān nayā ubhregā

sub.h aur shaam kī miltī huī sarhad ke qarīb

apne chehre pe shafaq-zār kī surḳhī le kar

ek insān nayā ubhregā

mere naġhme to rivāyāt ke pāband nahīñ

maiñ rivāyāt kī taḳhlīq kiyā kartā huuñ

mere naghme to riwayat ke paband nahin

tu ne shayad yahi samjha tha nadim

tu ne samjha tha ki shabnam ki KHunuk-tabi se

main tera rang mahal aur saja hi dunga

tu ne samjha tha ki pipal ke ghane sae mein

apne college ke hi ruman sunaunga tujhe

ek rangin si titli ke paron ke qisse

kuchh sehr-kar nigahon ke bayan

kuchh jawan sal adaon ke nishan

kuchh karunga lab o ruKHsar ki baaten tujh se

tu ne shayad yahi samjha tha nadim

tu ne ye kyun nahin samjha ki mere afsane

tanz ban kar teri sanson se ulajh jaenge

zindagi chand ki ThanDak hi nahin

zindagi garm mashinon ka dhuan bhi hai nadim

is dhuen mein mujhe zanjir nazar aati hai

mujh ko KHud teri hi taswir nazar aati hai

ghaur se dekh zara dekh to le

tujh ko Dar hai teri tahzib na jal jae kahin

mujh ko Dar hai ye riwayat na jal jaen kahin

phir ek din usi KHakistar se

ek nae ahd ki tamir to ho jaegi

ek insan naya ubhrega

subh aur sham ki milti hui sarhad ke qarib

apne chehre pe shafaq-zar ki surKHi le kar

ek insan naya ubhrega

mere naghme to riwayat ke paband nahin

main riwayat ki taKHliq kiya karta hun