rumuz-e-mohabbat

1

jab aañkh khol ke dekhā to ho gayā mastūr

ye merā dīda-e-bīnā hī ik hijāb huā

tū chhup gayā mah o anjum meñ lāla-o-gul meñ

har ek jalva-e-rañgīñ tirā naqāb huā

jab aañkh band huī tū hī jalva-ārā thā

2

mirī zabān khulī sharh-e-āshiqī ke liye

mirā bayāñ thā muraqqa.a mirī ḳhajālat kā

har ek harf meñ thā ġhairiyat kā afsāna

mirī zabāñ ne kiyā ḳhuuñ mirī mohabbat kā

mire sukūt meñ tūfān-e-ishq barpā thā

3

mire havās rahe tere vasl meñ haa.il

jo be-ḳhudī meñ huā ġharq tū milā mujh ko

ajiib shai hai mohabbat meñ ḳhud-farāmoshī

fanā huā to milī lazzat-e-baqā mujh ko

mirā vajūd hī ai dost ek parda thā

1

jab aankh khol ke dekha to ho gaya mastur

ye mera dida-e-bina hi ek hijab hua

tu chhup gaya mah o anjum mein lala-o-gul mein

har ek jalwa-e-rangin tera naqab hua

jab aankh band hui tu hi jalwa-ara tha

2

meri zaban khuli sharh-e-ashiqi ke liye

mera bayan tha muraqqa meri KHajalat ka

har ek harf mein tha ghairiyat ka afsana

meri zaban ne kiya KHun meri mohabbat ka

mere sukut mein tufan-e-ishq barpa tha

3

mere hawas rahe tere wasl mein hail

jo be-KHudi mein hua gharq tu mila mujh ko

ajib shai hai mohabbat mein KHud-faramoshi

fana hua to mili lazzat-e-baqa mujh ko

mera wajud hi ai dost ek parda tha