ru-posh hone ka din

ufuq vaale tah-ḳhāne se

vo barāmad huā din

jo qarnoñ pe bhārī hai

āñkhoñ ke aage

añdhere kā malba girātā hai

chau-taraf gherā banātā hai

haibat baḌhātā hai

muḳhbir

baḌe ātishī shīshe se

rāstoñ kā ghanā jaal taktā hai

bāhar

taġhāre ke nīche qadam ke nishāñ ko chhupāyā huā hai

lahad kī zarā sī jagah ko

falak-zār gumbad banāyā huā hai

gharoñ kī chhateñ uḌne bijlī kaḌakne

ma'an qurs-e-ḳhurshīd chhupne

safedī bhare āsmānī kināre ke tārīk hone kā din aa gayā hai

sharārat se sarshār

bahnoñ ke ḳhāmosh hone kā

aur maañ ke ḳhāmosh hone kā din aa gayā hai

mirī maañ

mirī an-kahī bāteñ aise samajhtī thī

dā.ūd jaise parindoñ kī bāteñ samajhtā thā

maañ kī mohabbat bharī god aaTe kā peḌā thī

jab maiñ humaktā

to maañ kī mohabbat bharī god aise pighaltī thī

dā.ūd ke haath meñ jaise lohā pighaltā thā

maiñ TūTtā to

harārat bharī god meñ

aise juḌtā thā

saara ke ḳhāvind kī āvāz par

jis tarah murġh juḌtā thā

aur dil tashakkur se bhartā thā

saara ke ḳhāvind kā dil

un pahāḌoñ ke pīchhe

kahīñ par safā aur marva nahīñ thī

jahāñ maañ mirī dauḌ saktī

phaTe nāḳhunoñ aur rā’sha-zada jism se

vo mohabbat bhare garm paanī chamakte hue āñsuoñ jaise paanī kī ḳhvāhish meñ

kaise kuaañ khod saktī

jahāñ par na paanī kī raushan jabīñ thī

na paanī thā

maiñ ne kahā thā ki maañ

mere lohe kī sūrat pighalne mire murġh kī tarah

TukḌoñ meñ taqsīm hone kā din aa gayā hai

zamānoñ talak

tere rone kā

bahnoñ ke ḳhāmosh hone kā

aur mere rū-posh hone kā din aa gayā hai

ufuq wale tah-KHane se

wo baramad hua din

jo qarnon pe bhaari hai

aankhon ke aage

andhere ka malba giraata hai

chau-taraf ghera banata hai

haibat baDhata hai

muKHbir

baDe aatishi shishe se

raston ka ghana jal takta hai

bahar

taghaare ke niche qadam ke nishan ko chhupaya hua hai

lahad ki zara si jagah ko

falak-zar gumbad banaya hua hai

gharon ki chhaten uDne bijli kaDakne

ma'an qurs-e-KHurshid chhupne

safedi bhare aasmani kinare ke tarik hone ka din aa gaya hai

shararat se sarshaar

bahnon ke KHamosh hone ka

aur man ke KHamosh hone ka din aa gaya hai

meri man

meri an-kahi baaten aise samajhti thi

daud jaise parindon ki baaten samajhta tha

man ki mohabbat bhari god aaTe ka peDa thi

jab main humakta

to man ki mohabbat bhari god aise pighalti thi

daud ke hath mein jaise loha pighalta tha

main TuTta to

hararat bhari god mein

aise juDta tha

sara ke KHawind ki aawaz par

jis tarah murgh juDta tha

aur dil tashakkur se bharta tha

sara ke KHawind ka dil

un pahaDon ke pichhe

kahin par safa aur marwa nahin thi

jahan man meri dauD sakti

phaTe naKHunon aur ra’sha-zada jism se

wo mohabbat bhare garm pani chamakte hue aansuon jaise pani ki KHwahish mein

kaise kuan khod sakti

jahan par na pani ki raushan jabin thi

na pani tha

main ne kaha tha ki man

mere lohe ki surat pighalne mere murgh ki tarah

TukDon mein taqsim hone ka din aa gaya hai

zamanon talak

tere rone ka

bahnon ke KHamosh hone ka

aur mere ru-posh hone ka din aa gaya hai