ruh-e-ashob

maiñ dāstānoñ meñ kho gayā huuñ

jahāñ pe har aañkh be-muravvat

jahāñ pe har shakl ajnabī hai

jahāñ añdheroñ meñ be-niyāzī

jahāñ ujāloñ meñ be-ruḳhī hai

jahāñ shab-o-roz kā tasalsul

junūñ ko zanjīr ho gayā hai

jahāñ har ik saaz kā tarannum

jahāñ har ik dil hai zaḳhm-ḳhurda

har ek ummīd sar-ba-zānū

har ek ehsās zard-rū hai

na ab mire haath meñ qalam hai

na ab mire lab pe mudda.ā hai

na aarzū hai na kuchh taqāzā

na koī shikva na koī ġham hai

na dard-e-dil hai na chashm-e-nam hai

ye kaisī duniyā meñ qaid huuñ maiñ

ye kin zamānoñ meñ kho gayā huuñ

mire rafīqo mujhe bachāo

talāsh karke kahīñ se laao

vo merī duniyā haqīqatoñ kī

vo merī duniyā sadāqatoñ kī

vo merī yādoñ kī shoḳh duniyā

jo aab kahīñ aur bas rahī hai

use sadā do use bulāo

ki maiñ fasānoñ meñ kho gayā huuñ

maiñ vaqt kī raat kā musāfir

maiñ gor-e-ehsās kā mujāvir

guzishta lamhoñ shikasta chehroñ

bujhe makānoñ meñ kho gayā huuñ

koī mujhe DhūñDne to aa.e

koī mirā khoj to lagā.e

vajūd ke vāhimoñ se pīchhe

adam ke sahrā-e-be-nishāñ meñ

mire taḳhayyul ke zard paikar

jo shahr taḳhlīq kar chuke haiñ

unheñ sañvāre unheñ basā.e

mohabbatoñ se ibādatoñ se

charāġh āñkhoñ kī raushnī se

mire sitāroñ ko jagmagā.e

mirī zamīnoñ ko nuur baḳhshe

hazār-hā chāñd aur sūraj

mirī jabīñ par bujhe hue haiñ

khaḌā huuñ pātāl par azal ke

maiñ āsmānoñ meñ kho gayā huuñ

na maiñ kisī lab pe jhilmilāyā

na maiñ kisī gosh hī meñ utrā

na saf.ha-e-sāda kī jabīñ par

kisī ne muddat se mujh ko likkhā

na mere ma.anī na koī sūrat

na kahne vaale se koī rishta

na sunñe vaale se koī nisbat

huuñ ek harf-e-qadīm goyā

na.ī zabānoñ meñ kho gayā huuñ

ye merī yādoñ ke sard saa.e

ye mere ḳhvāboñ ke zard chehre

rafāqatoñ ke nahīf baazū

adāvatoñ ke shikasta ḳhanjar

guzishta ra.anā.iyoñ ke paikar

purānī rāheñ purāne manzar

maiñ jin bahānoñ se jī rahā thā

unhī bahānoñ meñ kho gayā huuñ

maiñ dāstānoñ meñ kho gayā huuñ

main dastanon mein kho gaya hun

jahan pe har aankh be-murawwat

jahan pe har shakl ajnabi hai

jahan andheron mein be-niyazi

jahan ujalon mein be-ruKHi hai

jahan shab-o-roz ka tasalsul

junun ko zanjir ho gaya hai

jahan har ek saz ka tarannum

jahan har ek dil hai zaKHm-KHurda

har ek ummid sar-ba-zanu

har ek ehsas zard-ru hai

na ab mere hath mein qalam hai

na ab mere lab pe muddaa hai

na aarzu hai na kuchh taqaza

na koi shikwa na koi gham hai

na dard-e-dil hai na chashm-e-nam hai

ye kaisi duniya mein qaid hun main

ye kin zamanon mein kho gaya hun

mere rafiqo mujhe bachao

talash karke kahin se lao

wo meri duniya haqiqaton ki

wo meri duniya sadaqaton ki

wo meri yaadon ki shoKH duniya

jo aab kahin aur bas rahi hai

use sada do use bulao

ki main fasanon mein kho gaya hun

main waqt ki raat ka musafir

main gor-e-ehsas ka mujawir

guzishta lamhon shikasta chehron

bujhe makanon mein kho gaya hun

koi mujhe DhunDne to aae

koi mera khoj to lagae

wajud ke wahimon se pichhe

adam ke sahra-e-be-nishan mein

mere taKHayyul ke zard paikar

jo shahr taKHliq kar chuke hain

unhen sanware unhen basae

mohabbaton se ibaadaton se

charagh aankhon ki raushni se

mere sitaron ko jagmagae

meri zaminon ko nur baKHshe

hazar-ha chand aur suraj

meri jabin par bujhe hue hain

khaDa hun patal par azal ke

main aasmanon mein kho gaya hun

na main kisi lab pe jhilmilaya

na main kisi gosh hi mein utra

na safha-e-sada ki jabin par

kisi ne muddat se mujh ko likkha

na mere mani na koi surat

na kahne wale se koi rishta

na sunne wale se koi nisbat

hun ek harf-e-qadim goya

nai zabanon mein kho gaya hun

ye meri yaadon ke sard sae

ye mere KHwabon ke zard chehre

rafaqaton ke nahif bazu

adawaton ke shikasta KHanjar

guzishta ranaiyon ke paikar

purani rahen purane manzar

main jin bahanon se ji raha tha

unhi bahanon mein kho gaya hun

main dastanon mein kho gaya hun