ruhon ka hawala pyar

bañdhe hāthoñ meñ ham ne

sub.h-e-nau ke charāġh uThā rakhe haiñ

apnī āñkhoñ ko raushnī kā havāla de kar

kitāb-e-hijr meñ sitāroñ ko ujaal rakhā hai

kabhī to le ā.eñgī koī chāñd

merī shaam kī chaukhaT par merī āñkheñ

jo intizār kī dahlīz par sitāra banī baiThī haiñ

kabhī to tulū-e-āftāb shab ke dahāne par

shabnam ke qatroñ ko motī banā degā

hai mushkil meñ jaan hamārī lekin

zindagī kī chaukhaT par jiine kā sāmān kiye baiThe haiñ

tum se bichhaḌ kar ham ne shah-rag nahīñ kaaTī

tum kyā jaano shab-e-furqat ke azaab jān-levā to haiñ magar

ishq kī is dhīmī aañch par

jalne kā jo maza hai vo tumhāre mai-kade ke

jaam toḌ toḌ kar bhī na milā ham ko

dekho ye jo chār-sū vīrāniyāñ tanhā.iyāñ aur ḳhāmoshiyāñ haiñ

ye tumhāre des se hī aa.ī haiñ

ab rifāqat ke shab-o-roz kā itnā to haq ham par vājib hai

ki tumhārī dī huī hasratoñ ko

dil ke madfan par thoḌī sī jagah de deñ

suno ham zinda haiñ zindān-e-mohabbat meñ

jo agar ho kabhī mumkin to koī qissa vafā kā

hamāre naam likh denā

ham shahr-e-mohabbat ke Dase hue makīñ haiñ

hamārī rūhoñ kā havāla bas pyaar likh denā

hamāre dil ke madfan par yādoñ ke gulāb sajānā

jo tumhāre shahr kī havā.eñ haiñ

un ko hamārī galī kā pata de denā

bandhe hathon mein hum ne

subh-e-nau ke charagh uTha rakhe hain

apni aankhon ko raushni ka hawala de kar

kitab-e-hijr mein sitaron ko ujal rakha hai

kabhi to le aaengi koi chand

meri sham ki chaukhaT par meri aankhen

jo intizar ki dahliz par sitara bani baiThi hain

kabhi to tulu-e-aftab shab ke dahane par

shabnam ke qatron ko moti bana dega

hai mushkil mein jaan hamari lekin

zindagi ki chaukhaT par jine ka saman kiye baiThe hain

tum se bichhaD kar hum ne shah-rag nahin kaTi

tum kya jaano shab-e-furqat ke azab jaan-lewa to hain magar

ishq ki is dhimi aanch par

jalne ka jo maza hai wo tumhaare mai-kade ke

jam toD toD kar bhi na mila hum ko

dekho ye jo chaar-su viraniyan tanhaiyan aur KHamoshiyan hain

ye tumhaare des se hi aai hain

ab rifaqat ke shab-o-roz ka itna to haq hum par wajib hai

ki tumhaari di hui hasraton ko

dil ke madfan par thoDi si jagah de den

suno hum zinda hain zindan-e-mohabbat mein

jo agar ho kabhi mumkin to koi qissa wafa ka

hamare nam likh dena

hum shahr-e-mohabbat ke Dase hue makin hain

hamari ruhon ka hawala bas pyar likh dena

hamare dil ke madfan par yaadon ke gulab sajaana

jo tumhaare shahr ki hawaen hain

un ko hamari gali ka pata de dena