saaton ki numaindagi aur hum

sab kahānī ke kirdār

ham par numāyāñ kahāñ ho sake

jin ko āḳhir meñ milnā thā ik dūsre se

kahāñ kho ga.e

yūñhī chalte hue aur bhaTakte hue

ham bhī us kārvāñ se judā ho ga.e

jin kā zikr aane vaalī rivāyāt meñ yā kahānī meñ thā

sab sunā.ī huī loriyoñ meñ

parindoñ ke TuuTe paroñ kā nishāñ tak nahīñ

phir bhī ham aaj TuuTe diloñ kī

kahānī sunāte hue ek be-mā'nī chup

aur ThanDe diloñ kī

asātīrī ḳhvāhish ke asrār meñ kho ga.e

zindagī

zindagī aur kyā hai

ki pahle-pahal tum ko dekhā to

ham zindagī ke ma'ānī se vāqif hue

koī bhī to nahīñ pā sakā

aaj tak

ramz-e-insāniyat

dam-ba-ḳhud kā.enātoñ meñ us kī ikaa.ī

aur khaa.ī meñ vā'doñ ke ugte hue phuul

raushnī kī vasātat se

ḳhushbū meñ palte hue ḳhvāb haiñ

ḳhair duurī meñ paltā huā ek ḳhvāb

jis meñ tum ik sitāre ke mānind

arġhavānī falak par numūdār hone lagīñ

zindagī ham ko talḳhī se haT kar bahāne lagī

chaar sū raushnī ho ga.ī

aur jashn-e-bahārāñ meñ phūloñ pe aur peḌoñ pe

muskurātī huī niiñd sar uThāne lagī

ham chale jā rahe haiñ

zamān-o-makāñ se kahīñ be-ḳhabar

ki ham ko rivāyāt aur

ḳhvāhishoñ kī asīrī vaġhaira se

bāhar nikal kar

kisī man-chalī raah par

tum se milnā bhī hai

aur rivāyāt kī chakkiyoñ meñ

asīrī kī vābastagī meñ

Darāvne ḳhvāb

aur us ke tārīk jangal meñ

tum se bichhaḌnā bhī hai

sab kahani ke kirdar

hum par numayan kahan ho sake

jin ko aaKHir mein milna tha ek dusre se

kahan kho gae

yunhi chalte hue aur bhaTakte hue

hum bhi us karwan se juda ho gae

jin ka zikr aane wali riwayat mein ya kahani mein tha

sab sunai hui loriyon mein

parindon ke TuTe paron ka nishan tak nahin

phir bhi hum aaj TuTe dilon ki

kahani sunate hue ek be-ma'ni chup

aur ThanDe dilon ki

asatiri KHwahish ke asrar mein kho gae

zindagi

zindagi aur kya hai

ki pahle-pahal tum ko dekha to

hum zindagi ke ma'ani se waqif hue

koi bhi to nahin pa saka

aaj tak

ramz-e-insaniyat

dam-ba-KHud kaenaton mein us ki ikai

aur khai mein wa'don ke ugte hue phul

raushni ki wasatat se

KHushbu mein palte hue KHwab hain

KHair duri mein palta hua ek KHwab

jis mein tum ek sitare ke manind

arghawani falak par numudar hone lagin

zindagi hum ko talKHi se haT kar bahane lagi

chaar su raushni ho gai

aur jashn-e-bahaaran mein phulon pe aur peDon pe

muskuraati hui nind sar uThane lagi

hum chale ja rahe hain

zaman-o-makan se kahin be-KHabar

ki hum ko riwayat aur

KHwahishon ki asiri waghaira se

bahar nikal kar

kisi man-chali rah par

tum se milna bhi hai

aur riwayat ki chakkiyon mein

asiri ki wabastagi mein

Darawne KHwab

aur us ke tarik jangal mein

tum se bichhaDna bhi hai