sadiqin

tum ThiThurtī guzartī hoī shaam kī mad-bharī raushnī se

churā.e hue chaar pal kī kathā

sun sako to suno

sādiqīn ik galī meñ khaḌā thā

nasq-o-tā'līq kī uljhanoñ meñ ghirī zindagī

ik galī

jis ke chāroñ taraf

hasratoñ kā ḳhat-e-nasḳh

fiisā ġhauris ke mas.aloñ meñ uljhā huā

lā-sa.ī paḌh rahā thā

sādqīnī farāsat riyāzat kī manzil pe faa.ez ibādat kā ras pī rahī thī

chāñd kī gardisheñ puurī hone na paa.ī thiiñ us raat bhī

jab use us ke fan ne

ḳhudāvand se mahv-e-suḳhan dekh kar

ek bhar puur ta.azīmī sajda kiyā

nuqra.ī raushnī us ke māthe se phūTī thī jis ne galī ko mo.attar kiyā

nasq-o-tā'līq kī uljhanoñ meñ ghirī zindagī ik galī

jis ke duujī taraf

ilm-o-irfān ke shāḳh imkān ke dā.ere ban chuke hāshiye lag chuke the

magar vo ilāhī-sifat painT kī botaleñ kāġhazoñ par uñDele hue

naqsh-gardī meñ khoyā rahā

use is se matlab hī kyā thā ki kaun us ke khīñche hue ik sulus hāshiye tak pahuñchne kī ḳhātir mare jā rahā hai

magar raat ke ik pahar

chāñd jab bādaloñ meñ chhupā

ahrman ne kahā

merā ik naqsh bhī bikne vaalā nahīñ

to ab aisā karo us kī har qaus par ism-e-āzam likho

aur phir sālhā-sāl tak

sādiqīn ism-e-āzam banā

painT kī Dibiyoñ par use phūñkā jaatā rahā

naqsh-gar ism-e-āzam kā chhallā pahan kar usī naam kā vird karte rahe

be-zabāñ canvas kī har ik qaus meñ rañg bharte rahe

aql-o-vijdān kī rāgnī jis ko shab bāñsurī ne dinoñ ko sadā.eñ lagāte hue pairahan kar liyā sādiqīn us ke sur se na.e raag ījād kartā rahā

us kī panting meñ ruumī ke aflāk

aise zamīñ-bos the jaise cactus ḳhud apne hī māhaul se laḌ-jhagaḌ ret kī vādiyoñ meñ binā bārishoñ ke harā rañg oḌhe rahe

magar rafta rafta dinoñ kī masāfat

ne us ko magan kar diyā

vo rañgoñ bhare kār-ḳhāne meñ ḳhālī nigāhoñ se bas canvas ko hī taktā rahā ab jahāñ kuchh na thā

na taḳhlīq kī te na tartīb kī be

na rañgoñ kā re na kārī-garī kī vo ye

bas talātum ḳhayāloñ kī ḳhe

zulf-e-ishkāl shānoñ pa bikhrī huī

johd-e-mismār chādar meñ lipTī hoī

be-sabātī farāmoshiyoñ kī ḳhabar

nastālīqī lakīroñ meñ uljhī huī zindagī

sādiqīnī safar

tum ThiThurti guzarti hoi sham ki mad-bhari raushni se

churae hue chaar pal ki katha

sun sako to suno

sadiqin ek gali mein khaDa tha

nasq-o-ta'liq ki uljhanon mein ghiri zindagi

ek gali

jis ke chaaron taraf

hasraton ka KHat-e-nasKH

fisa ghauris ke masalon mein uljha hua

la-sai paDh raha tha

sadqini farasat riyazat ki manzil pe faez ibaadat ka ras pi rahi thi

chand ki gardishen puri hone na pai thin us raat bhi

jab use us ke fan ne

KHudawand se mahw-e-suKHan dekh kar

ek bhar pur tazimi sajda kiya

nuqrai raushni us ke mathe se phuTi thi jis ne gali ko moattar kiya

nasq-o-ta'liq ki uljhanon mein ghiri zindagi ek gali

jis ke duji taraf

ilm-o-irfan ke shaKH imkan ke daere ban chuke hashiye lag chuke the

magar wo ilahi-sifat painT ki botalen kaghazon par unDele hue

naqsh-gardi mein khoya raha

use is se matlab hi kya tha ki kaun us ke khinche hue ek sulus hashiye tak pahunchne ki KHatir mare ja raha hai

magar raat ke ek pahar

chand jab baadalon mein chhupa

ahrman ne kaha

mera ek naqsh bhi bikne wala nahin

to ab aisa karo us ki har qaus par ism-e-azam likho

aur phir salha-sal tak

sadiqin ism-e-azam bana

painT ki Dibiyon par use phunka jata raha

naqsh-gar ism-e-azam ka chhalla pahan kar usi nam ka wird karte rahe

be-zaban canwas ki har ek qaus mein rang bharte rahe

aql-o-wijdan ki ragni jis ko shab bansuri ne dinon ko sadaen lagate hue pairahan kar liya sadiqin us ke sur se nae rag ijad karta raha

us ki panting mein rumi ke aflak

aise zamin-bos the jaise cactus KHud apne hi mahaul se laD-jhagaD ret ki wadiyon mein bina barishon ke hara rang oDhe rahe

magar rafta rafta dinon ki masafat

ne us ko magan kar diya

wo rangon bhare kar-KHane mein KHali nigahon se bas canwas ko hi takta raha ab jahan kuchh na tha

na taKHliq ki te na tartib ki be

na rangon ka re na kari-gari ki wo ye

bas talatum KHayalon ki KHe

zulf-e-ishkal shanon pa bikhri hui

johd-e-mismar chadar mein lipTi hoi

be-sabaati faramoshiyon ki KHabar

nastaliqi lakiron mein uljhi hui zindagi

sadiqini safar