sae ka iztirab

aaj tum tak pahuñch kar

tumhārī āñkhoñ ke ā.īnoñ meñ jhāñk kar

ḳhud ko TaTolā

to mālūm huā ki

merā jism to tum tak aate aate

kahīñ biich raste meñ gum ho gayā thā

merā dil!!

kisī aur siine meñ dabā diyā gayā thā

mire hoñT

surḳhiyoñ kī tahoñ ke nīche

paḌe paḌe siyāh ho chuke the

merī ḳhushbū

jo maiñ tumhāre liye lā rahī thī

kisī pichhle jhoñke ne

apne jism meñ Taañk lī thī

merā ḳhvāb

apnī raat kī kokh meñ

ġhalatī se kisī aur ke liye

sub.h kā pahlā harf rakh chukā thā

mere qalam kī raushnā.ī ko

lafz kā ek samundar pī chukā thā

aur merī āñkhoñ kī putliyoñ meñ nāchtī raushnī kī

kisī sarāb se dostī ho chukī thī

aur ab vo shāyad isī ke saath bah rahī hai

so ab tumhārī āñkhoñ ke ā.īnoñ meñ

maiñ nahīñ

sirf ek saa.e kā iztirāb

Doltā nazar aa rahā hai

aaj tum tak pahunch kar

tumhaari aankhon ke aainon mein jhank kar

KHud ko TaTola

to malum hua ki

mera jism to tum tak aate aate

kahin bich raste mein gum ho gaya tha

mera dil!!

kisi aur sine mein daba diya gaya tha

mere honT

surKHiyon ki tahon ke niche

paDe paDe siyah ho chuke the

meri KHushbu

jo main tumhaare liye la rahi thi

kisi pichhle jhonke ne

apne jism mein Tank li thi

mera KHwab

apni raat ki kokh mein

ghalati se kisi aur ke liye

subh ka pahla harf rakh chuka tha

mere qalam ki raushnai ko

lafz ka ek samundar pi chuka tha

aur meri aankhon ki putliyon mein nachti raushni ki

kisi sarab se dosti ho chuki thi

aur ab wo shayad isi ke sath bah rahi hai

so ab tumhaari aankhon ke aainon mein

main nahin

sirf ek sae ka iztirab

Dolta nazar aa raha hai