sahab-e-KHanqah se

aa is taraf bhī ābid-e-shab-zinda-dār dekh

mauj-e-havā meñ silsila-e-zulf-e-yār dekh

be-bāda kis ne paa.e haiñ asrār-e-kā.enāt

aa mai-kade meñ raqs-e-mai-e-ḳhush-gavār dekh

kab tak rahīn-e-jalva-gah-e-hūr-o-salsabīl

jangal kī deviyoñ ko lab-e-jūebār dekh

jin kī har ek buuñd meñ ġhaltāñ hai ḳhuld-e-aish

un bādaloñ kā raqs sar-e-kohsār dekh

be-kaifiyoñ meñ ruuh kī tābindagī kahāñ

aa chāñdnī meñ bahte hue ābshār dekh

har phuul meñ hai duḳhtar-e-irfāñ khulā huā

rangīnī-e-bahār ba-qadr-e-bahār dekh

tā-chand saumi’a meñ ye rahmat kī justujū

aa mai-kade meñ rahmat-e-parvardigār dekh

aa is taraf bhi aabid-e-shab-zinda-dar dekh

mauj-e-hawa mein silsila-e-zulf-e-yar dekh

be-baada kis ne pae hain asrar-e-kaenat

aa mai-kade mein raqs-e-mai-e-KHush-gawar dekh

kab tak rahin-e-jalwa-gah-e-hur-o-salsabil

jangal ki dewiyon ko lab-e-juebar dekh

jin ki har ek bund mein ghaltan hai KHuld-e-aish

un baadalon ka raqs sar-e-kohsar dekh

be-kaifiyon mein ruh ki tabindagi kahan

aa chandni mein bahte hue aabshaar dekh

har phul mein hai duKHtar-e-irfan khula hua

rangini-e-bahaar ba-qadr-e-bahaar dekh

ta-chand saumi’a mein ye rahmat ki justuju

aa mai-kade mein rahmat-e-parwardigar dekh