sahilon se kaho, main nahin aaunga

sāhiloñ se kaho, maiñ nahīñ ā.ūñgā

ab kisī shahr kī raat mere liye jagmagā.e nahīñ

dhuup būḌhe makānoñ kī ūñchī chhatoñ par mirā naam le kar bulā.e nahīñ

maiñ nahīñ ā.ūñgā

yaad aatā hai, ik din kisī se kahā thā

tujhe pahan kar duur ke shahr kī ajnabī dhartiyoñ meñ utar jā.ūñgā

maiñ aqīda huuñ: mar jā.ūñgā

yaad aatā hai, ik din kisī ne kahā thā

meñ tere liye, tere ehsās kī vādiyoñ kī ghanī chhāñv meñ pur-sukūñ

niiñd so jā.ūñgī

be-sadā lafz huuñ, terī āñkhoñ meñ kho jā.ūñgī

yaad aatā hai, ik din mire rū-ba-rū: ek pur-shor aur be-karāñ bahr thā

yaad aatā hai, ik din mire rū-ba-rū: meñ koī jāgtā jagmagātā huā

Dūbtā shahr thā

ek āvāz thii: dūriyoñ se bulātī huī

ek āvāz thii, duur ke ik akele pahāḌī nagar ke anokhe se manzar

dikhātī huī

mujh se chhū kar kahīñ duur jaatī huī

vaqt mujh se pare

vaqt tujh se pare

maiñ aqīda huuñ

tū be-sadā lafz hai

apne apne badan ke alaao meñ jal jā.eñge

duur ke

jagmagāte hue

muntazir sāhiloñ se kaho

ham nahīñ ā.eñge

ham nahīñ ā.eñge

sahilon se kaho, main nahin aaunga

ab kisi shahr ki raat mere liye jagmagae nahin

dhup buDhe makanon ki unchi chhaton par mera nam le kar bulae nahin

main nahin aaunga

yaad aata hai, ek din kisi se kaha tha

tujhe pahan kar dur ke shahr ki ajnabi dhartiyon mein utar jaunga

main aqida hun: mar jaunga

yaad aata hai, ek din kisi ne kaha tha

mein tere liye, tere ehsas ki wadiyon ki ghani chhanw mein pur-sukun

nind so jaungi

be-sada lafz hun, teri aankhon mein kho jaungi

yaad aata hai, ek din mere ru-ba-ru: ek pur-shor aur be-karan bahr tha

yaad aata hai, ek din mere ru-ba-ru: mein koi jagta jagmagata hua

Dubta shahr tha

ek aawaz thi: duriyon se bulati hui

ek aawaz thi, dur ke ek akele pahaDi nagar ke anokhe se manzar

dikhati hui

mujh se chhu kar kahin dur jati hui

waqt mujh se pare

waqt tujh se pare

main aqida hun

tu be-sada lafz hai

apne apne badan ke alao mein jal jaenge

dur ke

jagmagate hue

muntazir sahilon se kaho

hum nahin aaenge

hum nahin aaenge