sahira

vo sāhira thī yā kisī ḳhayāl kā vajūd thī

ḳhudī meñ ek ḳhvāb thī yā ḳhvāb kī numūd thī

vo aañkh thī yā jal rahe the sard raat ke diye

vo saañs thī ki chal rahe the ḳhushbuoñ ke qāfile

vo rahguzar pe chal rahī thī manzaroñ ke darmiyāñ

vo sā.ebāñ kiye hue thī sar pe us ke kahkashāñ

utar ke dil kī vādiyoñ meñ ek kaam kar ga.ī

tamāzatoñ ke shahr meñ hasīn shaam kar ga.ī

jamāl-e-husn-e-yār kī vafā bhī kyā hī ḳhuub thī

kamāl-e-dilbarī kī vo adā bhī kyā hī ḳhuub thī

vo titliyoñ ke rang sā banā huā thā pairahan

gulāb mausamoñ meñ jaise ghul rahā thā gul-badan

vo jugnūoñ ke des meñ khilī khilī sī chāñdnī

vo chāñdnī ke bhes meñ ruke ruke se mehr-o-māh

vo manzaroñ pe khul rahā thā us kā husn-e-jāvedāñ

qadam qadam pe ho rahe the us pe aa ke mehrbāñ

vo boltī to lafz us ke hoñT chūmte the nā

vo gungunā rahī thī to shajar bhī jhūmte the nā

vo zulf thī ki raat kā samāñ banā rahī thī yaar

vo muskurā ke manzaroñ kā dil jalā rahī thī yaar

vo dhaḌkanoñ ke saaz par bhī zindagī kā raqs thā

vo ā.ina-misāl thī yā ḳhushbuoñ kā aks thā

vo chūḌiyoñ kī taal par bhī kaif thā fazāoñ meñ

vo surma.ī sī shaam meñ kisī hasīn gaañv meñ

thī rū-ba-rū to yuuñ lagā ki chāñd aa gayā koī

falak pe aaTh rang kī dhanak banā gayā koī

vo haath thaam kar mirā chalī to phuul khil uThe

vo tāqchoñ meñ muntazir charāġh ḳhud hī jal uThe

vo saath saath thī to phir zamāñ badalne lag ga.e

zamāñ to phir zamāñ bhalā jahāñ badalne lag ga.e

guzār lī jo us ke sang zindagī tamām thī

baḌī hasīn sub.h thī baḌī hasīn shaam thī

wo sahira thi ya kisi KHayal ka wajud thi

KHudi mein ek KHwab thi ya KHwab ki numud thi

wo aankh thi ya jal rahe the sard raat ke diye

wo sans thi ki chal rahe the KHushbuon ke qafile

wo rahguzar pe chal rahi thi manzaron ke darmiyan

wo saeban kiye hue thi sar pe us ke kahkashan

utar ke dil ki wadiyon mein ek kaam kar gai

tamazaton ke shahr mein hasin sham kar gai

jamal-e-husn-e-yar ki wafa bhi kya hi KHub thi

kamal-e-dilbari ki wo ada bhi kya hi KHub thi

wo titliyon ke rang sa bana hua tha pairahan

gulab mausamon mein jaise ghul raha tha gul-badan

wo jugnuon ke des mein khili khili si chandni

wo chandni ke bhes mein ruke ruke se mehr-o-mah

wo manzaron pe khul raha tha us ka husn-e-jawedan

qadam qadam pe ho rahe the us pe aa ke mehrban

wo bolti to lafz us ke honT chumte the na

wo gunguna rahi thi to shajar bhi jhumte the na

wo zulf thi ki raat ka saman bana rahi thi yar

wo muskura ke manzaron ka dil jala rahi thi yar

wo dhaDkanon ke saz par bhi zindagi ka raqs tha

wo aaina-misal thi ya KHushbuon ka aks tha

wo chuDiyon ki tal par bhi kaif tha fazaon mein

wo surmai si sham mein kisi hasin ganw mein

thi ru-ba-ru to yun laga ki chand aa gaya koi

falak pe aaTh rang ki dhanak bana gaya koi

wo hath tham kar mera chali to phul khil uThe

wo taqchon mein muntazir charagh KHud hi jal uThe

wo sath sath thi to phir zaman badalne lag gae

zaman to phir zaman bhala jahan badalne lag gae

guzar li jo us ke sang zindagi tamam thi

baDi hasin subh thi baDi hasin sham thi