sal-e-nau ka hangama

bartāniya kī chhiḌ ga.ī hindostāñ se jang

hālāñki is se jang hai saare jahāñ se jang

giitā se aur granth se zor-āzmā.iyāñ

qur.ān kī āyatoñ ke qushūn-e-girāñ se jang

arjun ke aur bhiim ke ghar se muqābla

phir ḳhāndān-e-sarvar-e-kaun-o-makāñ se jang

tauhīd ke alam ko jhukāne ke hausle

jo qudsiyoñ ke haath meñ hai us nishāñ se jang

sarhad ke ġhāziyoñ ko kuchalne kī niyyateñ

bachche se jang būḌhe se jang aur javāñ se jang

sulh o salām o amn-o-amāñ jis kī hai matā.a

ġhārat-garoñ kī Than ga.ī us kārvāñ se jang

barq aur duḳhāñ pe kyoñ na ho īmān ḳhanda-zan

karne chalī hai aaj zamīñ āsmāñ se jang

hai zer-dastiyoñ pe zabardastiyoñ kī tāḳht

morān-e-nīm-jān kī hai pīl-e-damāñ se jang

dhāvā sipāh-e-jabr kā hai ḳhail-e-sabr par

top aur tufang kī hai qalam aur zabāñ se jang

ham nā-tavāñ sahī hai ḳhudā to hamāre saath

ab bhī vo karte haiñ to kareñ nā-tavāñ se jang

zarre ke saath jang hai jang āftāb se

ḳhuffāsh kī abas hai shah-e-ḳhāvarāñ se jang

bartaniya ki chhiD gai hindostan se jang

haalanki is se jang hai sare jahan se jang

gita se aur granth se zor-azmaiyan

quran ki aayaton ke qushun-e-giran se jang

arjun ke aur bhim ke ghar se muqabla

phir KHandan-e-sarwar-e-kaun-o-makan se jang

tauhid ke alam ko jhukane ke hausle

jo qudsiyon ke hath mein hai us nishan se jang

sarhad ke ghaziyon ko kuchalne ki niyyaten

bachche se jang buDhe se jang aur jawan se jang

sulh o salam o amn-o-aman jis ki hai mataa

ghaarat-garon ki Than gai us karwan se jang

barq aur duKHan pe kyon na ho iman KHanda-zan

karne chali hai aaj zamin aasman se jang

hai zer-dastiyon pe zabardastiyon ki taKHt

moran-e-nim-jaan ki hai pil-e-daman se jang

dhawa sipah-e-jabr ka hai KHail-e-sabr par

top aur tufang ki hai qalam aur zaban se jang

hum na-tawan sahi hai KHuda to hamare sath

ab bhi wo karte hain to karen na-tawan se jang

zarre ke sath jang hai jang aaftab se

KHuffash ki abas hai shah-e-KHawaran se jang