sal-girah ki raat

aaj darvāze khule rahne do

yaad kī aag dahak uTThī hai

shāyad is raat hamāre shohdā aa jaa.eñ

aaj darvāze khule rahne do

jānte ho kabhī tanhā nahīñ chalte haiñ shahīd?

maiñ ne dariyā ke kināre jo pare dekhe haiñ

jo charāġhoñ kī laveñ dekhīñ haiñ

vo laveñ boltī thiiñ zinda zabānoñ kī tarah

maiñ ne sarhad pe vo naġhmāt sune haiñ ki jinheñ

kaun gā.egā shahīdoñ ke sivā?

maiñ ne hoñToñ pe tabassum kī na.ī tez chamak dekhī hai

nuur jis kā thā halāvat se sharābor

azānoñ kī tarah!

abhī sarhad se maiñ lauTā huuñ abhī,

maiñ abhī haañp rahā huuñ mujhe dam lene do

raaz vo un kī nigāhoñ meñ nazar aayā hai

jo hama-gīr thā nādīda zamānoñ kī tarah!

yaad kī aag dahak uTThī hai

sab tamannāoñ ke shahroñ meñ dahak uTThī hai

aaj darvāze khule rahne do

shāyad is raat hamāre shohdā aa jā.eñ!

vaqt ke paañv ulajh jaate haiñ āvāz kī zanjīroñ se

un kī jhankār se ḳhud vaqt jhanak uThtā hai

naġhma martā hai kabhī, naala bhī martā hai kabhī?

sansanāhaT kabhī jaatī hai mohabbat ke bujhe tīroñ se?

maiñ ne dariyā ke kināre unheñ yuuñ dekhā hai

maiñ ne jis aan meñ dekhā hai unheñ

shāyad is raat,

is shaam hii,

darvāzoñ pe dastak deñge!

shohdā itne subuk-pā haiñ ki jab ā.eñge

na kisī so.e parinde ko ḳhabar tak hogī

na daraḳhtoñ se kisī shāḳh ke girne kī sadā gūñjegī

phaḌphaḌāhaT kisī zambūr kī bhī kam hī sunā.ī degī

aaj darvāze khule rahne do!

abhī sarhad se maiñ lauTā huuñ abhī

paar jo guzregī us kā hameñ ġham hī kyuuñ ho?

paar kyā guzregī ma.alūm nahīñ

ek shab jis meñ

pareshānī-e-ālām se rūhoñ pe girānī taarī

rūheñ sunsān yatīm

un pe hamesha kī jafā.eñ bhārī

bū-e-kāfūr agar baste gharoñ se jaarī

be-panāh ḳhauf meñ rūyā-e-shikasta kī fuġhāñ uTThegī

bujhtī sham.oñ kā dhuāñ uTThegā

paar jo guzregī ma.alūm nahīñ

apne darvāze khule rahne do

aaj darwaze khule rahne do

yaad ki aag dahak uTThi hai

shayad is raat hamare shohda aa jaen

aaj darwaze khule rahne do

jaante ho kabhi tanha nahin chalte hain shahid?

main ne dariya ke kinare jo pare dekhe hain

jo charaghon ki lawen dekhin hain

wo lawen bolti thin zinda zabanon ki tarah

main ne sarhad pe wo naghmat sune hain ki jinhen

kaun gaega shahidon ke siwa?

main ne honTon pe tabassum ki nai tez chamak dekhi hai

nur jis ka tha halawat se sharabor

azanon ki tarah!

abhi sarhad se main lauTa hun abhi,

main abhi hanp raha hun mujhe dam lene do

raaz wo un ki nigahon mein nazar aaya hai

jo hama-gir tha nadida zamanon ki tarah!

yaad ki aag dahak uTThi hai

sab tamannaon ke shahron mein dahak uTThi hai

aaj darwaze khule rahne do

shayad is raat hamare shohda aa jaen!

waqt ke panw ulajh jate hain aawaz ki zanjiron se

un ki jhankar se KHud waqt jhanak uThta hai

naghma marta hai kabhi, nala bhi marta hai kabhi?

sansanahaT kabhi jati hai mohabbat ke bujhe tiron se?

main ne dariya ke kinare unhen yun dekha hai

main ne jis aan mein dekha hai unhen

shayad is raat,

is sham hi,

darwazon pe dastak denge!

shohda itne subuk-pa hain ki jab aaenge

na kisi soe parinde ko KHabar tak hogi

na daraKHton se kisi shaKH ke girne ki sada gunjegi

phaDphaDahaT kisi zambur ki bhi kam hi sunai degi

aaj darwaze khule rahne do!

abhi sarhad se main lauTa hun abhi

par jo guzregi us ka hamein gham hi kyun ho?

par kya guzregi malum nahin

ek shab jis mein

pareshani-e-alam se ruhon pe girani tari

ruhen sunsan yatim

un pe hamesha ki jafaen bhaari

bu-e-kafur agar baste gharon se jari

be-panah KHauf mein ruya-e-shikasta ki fughan uTThegi

bujhti shamon ka dhuan uTThega

par jo guzregi malum nahin

apne darwaze khule rahne do