sal nau ke liye ek nazm

duā.eñ aur duāoñ se bharī

be-ant tahrīreñ

mujhe har saal ke in āḳhirī

lamhoñ meñ miltī haiñ

mere ahbāb ke nāmoñ meñ

aksar darj hotā hai

ḳhudā mahfūz rakkhe

saal bhar mujh ko balāoñ se

mujhe zahr ab maiñ lipTī havā.eñ

chhū ke na guzrīñ

mujhe maujūd aur aane vaale

saal ke lamhe

mubārak dar mubārak hoñ

yahī tahrīr maiñ ahbāb ko

vāpas luTātā huuñ

yahī jazbāt mere dostoñ

ke naam hote haiñ

magar phir vaqt ke hāthoñ

na jaane kyā guzartī hai

ki jo bhī tiir aatā hai

usī jānib se aatā hai

jahāñ se itr meñ Duubā huā

paiġhām aayā thā

jahāñ se saal bhar

mahfūz rahne kā

hasīñ malfūf

mere naam aayā thā

duaen aur duaon se bhari

be-ant tahriren

mujhe har sal ke in aaKHiri

lamhon mein milti hain

mere ahbab ke namon mein

aksar darj hota hai

KHuda mahfuz rakkhe

sal bhar mujh ko balaon se

mujhe zahr ab main lipTi hawaen

chhu ke na guzrin

mujhe maujud aur aane wale

sal ke lamhe

mubarak dar mubarak hon

yahi tahrir main ahbab ko

wapas luTata hun

yahi jazbaat mere doston

ke nam hote hain

magar phir waqt ke hathon

na jaane kya guzarti hai

ki jo bhi tir aata hai

usi jaanib se aata hai

jahan se itr mein Duba hua

paigham aaya tha

jahan se sal bhar

mahfuz rahne ka

hasin malfuf

mere nam aaya tha