salgirah

kaun gustāḳh hai kyā naam hai kyuuñ aayā hai

pahre vaalo use ḳhanjar kī anī se roko

apnī bandūqoñ kī naalī se Darāo us ko

aur us par jo na maane use topoñ kī salāmī de do

jashn kā din hai mirī sālgirah kā din hai

aaj mahloñ meñ jaleñge mah-o-anjum ke charāġh

aaj bujhte hue chehroñ kī zarūrat kyā hai

aaj māyūs nigāhoñ kī zarūrat kyā hai

kaun bebāk hai baḌhtā hī chalā aatā hai

pahre vaalo use ḳhanjar kī anī se roko

aadmī hai ki mirā vahm hai aaseb hai ye

us ke chehre pe to zaḳhmoñ ke nishāñ tak bhī nahīñ

goliyāñ us ke siyah siine se Takrā ke chalī aatī haiñ

us ke hoñToñ pe tabassum hai ki muñh khole hue

azhdahā taḳht nigalne ko chalā aatā hai

maut kis bhes meñ aa.ī hai mujhe lene ko

aaj kyuuñ aa.ī hai kyuuñ aa.ī hai kyuuñ aa.ī hai

maiñ tujhe gauhar-o-almās diye detā huuñ

tere ThiThure hue hāthoñ ko harārat dūñgā

jashn kā din hai mirī sālgirah kā din hai

kaun ho kaun ho tum

ai ġharīboñ ke ḳhudāvand amīroñ ke rafīq

maiñ samajhtā thā mujhe aap na pahchāneñge

maiñ ne añgrez kī jailoñ meñ javānī kaaTī

maiñ ne ThiThure hue hāthoñ se jalā.e haiñ diye

jin kī lau aaj bhī tūfānoñ se Takrātī hai

jin ko añgrez kī phūñkoñ ne bujhānā chāhā

aur ḳhud un kī zabāñ jal ke siyah-fām huī

vo diye aaj bhī bar-laūñ kī chīḳhoñ se laḌe jaate haiñ

aap ko yaad na hogā shāyad

kaun ho kaun ho tum

maiñ ne tārīḳh kī lahroñ meñ ravānī de dī

maiñ ne būḌhoñ kī rag-o-pai meñ javānī de dī

maiñ ne jhukte hue shānoñ ko tavānā.ī dī

kār-ḳhāne mirī āvāz se bedār hue

aur ik merī hī āvāz nahīñ gūñjī thī

saikḌoñ vaqt se haare hue insān uThe

kuhra-e-vaqt pe chhāne ke liye

kaun ho kaun ho tum

aurāq meñ hī nahīñ aayā huuñ

saikḌoñ vaqt ke maare hue insān bhī haiñ

saikḌoñ vaqt pe chhā.e hue insān bhī haiñ

kaun ho kaun ho tum

aaj bhī ketiyoñ meñ bhuuk ugā kartī hai

kār-ḳhānoñ meñ dhueñ ke bādal

tauq aur āhanī zanjīroñ meñ Dhal jaate haiñ

kaun ho kaun ho tum

aap insān kī azmat pe yaqīñ rakhte haiñ

aap ke hukm ne kitnoñ kī zabāneñ sī diiñ

aap kī mumlikat adl meñ kitne bīmār

qaid-e-tanhā.ī meñ dam toḌ chuke

kaun ho kaun ho tum

aap kī beḌiyāñ afrād ko pāband banā saktī haiñ

aap kī beḌiyāñ insān ko pāband nahīñ kar saktīñ

kal yahī sham.a jo siine meñ farozāñ hai aaj

aap ke saare tilismāt jalā Dālegī

kal unhīñ khetoñ meñ ujḌe hue khaliyānoñ meñ

sāl-hā-sāl kī pāmāl zamīñ

apne siine ke ḳhazānoñ ko luTātī hogī

kār-ḳhāne bhī siyahkār ḳhudāoñ se rihā.ī pā kar

lākhoñ insānoñ kī taskīn kā sāmāñ hoñge

ik na.e ahd na.ī ziist kā unvāñ hoñge

aur phir vaqt kā bebāk mo.arriḳh aa kar

surḳh parcham ko salāmī degā

kaun ho kaun ho tum

bhārdvāj

kaun gustaKH hai kya nam hai kyun aaya hai

pahre walo use KHanjar ki ani se roko

apni banduqon ki nali se Darao us ko

aur us par jo na mane use topon ki salami de do

jashn ka din hai meri salgirah ka din hai

aaj mahlon mein jalenge mah-o-anjum ke charagh

aaj bujhte hue chehron ki zarurat kya hai

aaj mayus nigahon ki zarurat kya hai

kaun bebak hai baDhta hi chala aata hai

pahre walo use KHanjar ki ani se roko

aadmi hai ki mera wahm hai aaseb hai ye

us ke chehre pe to zaKHmon ke nishan tak bhi nahin

goliyan us ke siyah sine se Takra ke chali aati hain

us ke honTon pe tabassum hai ki munh khole hue

azhdaha taKHt nigalne ko chala aata hai

maut kis bhes mein aai hai mujhe lene ko

aaj kyun aai hai kyun aai hai kyun aai hai

main tujhe gauhar-o-almas diye deta hun

tere ThiThure hue hathon ko hararat dunga

jashn ka din hai meri salgirah ka din hai

kaun ho kaun ho tum

ai gharibon ke KHudawand amiron ke rafiq

main samajhta tha mujhe aap na pahchanenge

main ne angrez ki jailon mein jawani kaTi

main ne ThiThure hue hathon se jalae hain diye

jin ki lau aaj bhi tufanon se Takraati hai

jin ko angrez ki phunkon ne bujhana chaha

aur KHud un ki zaban jal ke siyah-fam hui

wo diye aaj bhi bar-laun ki chiKHon se laDe jate hain

aap ko yaad na hoga shayad

kaun ho kaun ho tum

main ne tariKH ki lahron mein rawani de di

main ne buDhon ki rag-o-pai mein jawani de di

main ne jhukte hue shanon ko tawanai di

kar-KHane meri aawaz se bedar hue

aur ek meri hi aawaz nahin gunji thi

saikDon waqt se haare hue insan uThe

kuhra-e-waqt pe chhane ke liye

kaun ho kaun ho tum

auraq mein hi nahin aaya hun

saikDon waqt ke mare hue insan bhi hain

saikDon waqt pe chhae hue insan bhi hain

kaun ho kaun ho tum

aaj bhi ketiyon mein bhuk uga karti hai

kar-KHanon mein dhuen ke baadal

tauq aur aahani zanjiron mein Dhal jate hain

kaun ho kaun ho tum

aap insan ki azmat pe yaqin rakhte hain

aap ke hukm ne kitnon ki zabanen si din

aap ki mumlikat adl mein kitne bimar

qaid-e-tanhai mein dam toD chuke

kaun ho kaun ho tum

aap ki beDiyan afrad ko paband bana sakti hain

aap ki beDiyan insan ko paband nahin kar saktin

kal yahi shama jo sine mein farozan hai aaj

aap ke sare tilismat jala Dalegi

kal unhin kheton mein ujDe hue khaliyanon mein

sal-ha-sal ki pamal zamin

apne sine ke KHazanon ko luTati hogi

kar-KHane bhi siyahkar KHudaon se rihai pa kar

lakhon insanon ki taskin ka saman honge

ek nae ahd nai zist ka unwan honge

aur phir waqt ka bebak moarriKH aa kar

surKH parcham ko salami dega

kaun ho kaun ho tum

bhaardwaj