sanp! aa kaT mujhe

sāñp! aa kaaT mujhe eḌī par

maiñ tujhe dāna-e-gandum kī qasam detā huuñ

shahr ke ūñche makānoñ pe chamaktā sūraj

mujh se kahtā hai ki tū nañgā hai

aur mirī ruuh mujhe kahtī hai

jism ko Dhāñk mirī shahr meñ tazlīl na kar

mujh ko ehsās hai maiñ nañgā huuñ

sub.h ke nuur ke mānind mujhe

koī malbūs azal se na milā

sabz pattoñ ne sahārā na diyā

sāñp! aa kaaT mujhe

baḳhsh de maut kā malbūs mujhe

dekh ab jism mirā

din kī garmī se jhulastā hai kabhī

aur phir raat kī sardī se TheThurtā hai kabhī

aur mirī ruuh mujhe kahtī hai

jism ko Dhāñk mirī shahr meñ tazlīl na kar

sāñp! aa kaaT mujhe eḌī par

aur mire jism ko ghultā huā tāñbā kar de

sub.h kā nuur jise dekh ke sharmā jaa.e

aur mirī ruuh kahe

ab tujhe maut nahīñ aa.egī

maiñ tujhe dāna-e-gandum kī qasam detā huuñ

sanp! aa kaT mujhe eDi par

main tujhe dana-e-gandum ki qasam deta hun

shahr ke unche makanon pe chamakta suraj

mujh se kahta hai ki tu nanga hai

aur meri ruh mujhe kahti hai

jism ko Dhank meri shahr mein tazlil na kar

mujh ko ehsas hai main nanga hun

subh ke nur ke manind mujhe

koi malbus azal se na mila

sabz patton ne sahaara na diya

sanp! aa kaT mujhe

baKHsh de maut ka malbus mujhe

dekh ab jism mera

din ki garmi se jhulasta hai kabhi

aur phir raat ki sardi se TheThurta hai kabhi

aur meri ruh mujhe kahti hai

jism ko Dhank meri shahr mein tazlil na kar

sanp! aa kaT mujhe eDi par

aur mere jism ko ghulta hua tanba kar de

subh ka nur jise dekh ke sharma jae

aur meri ruh kahe

ab tujhe maut nahin aaegi

main tujhe dana-e-gandum ki qasam deta hun