sans KHushbu se ladi jati hai

jab udāsī dar-o-dīvār pe chhā jaatī hai

dil ke tāroñ meñ kahīñ saat suroñ kī maalā

ek ḳhāmosh chhanāke se bikhar jaatī hai

jab maiñ hālāt ke baḳhshe hue māyūs añdheroñ meñ kahīñ duur bhaTak jaatī huuñ

haath ko haath sujhā.ī nahīñ dene lagtā

dil kisī zard sitāre kā savālī ban kar

ghup añdhere meñ kisī raah kī nākām talab kartā hai

tab kahīñ ḳhizr-sifat chāñd nikal aatā hai

shāḳh-e-jāñ par na.ī ummīd kī kaliyāñ sī mahak uThtī haiñ

saañs ḳhushbū se ladī jaatī hai

mujh pe chaltā nahīñ phir ghor añdheroñ kā tilism

ki mujhe us kī ulūhī kirneñ

ḳhud meñ mahsūr kiye rahtī haiñ

chāñd kā nuur ki mizrāb kī mānind mirī zaat ke sur

mujh ko lauTātā hai ik pyaar bharī lai ke saath

maiñ bhī hañstī huī duniyā meñ palaT aatī huuñ

in palaTte hue lamhāt kā e.azāz mire chāñd tujhe hāsil hai

terī din-rāt kī gardish hai mirī zaat ke gird

aur ik terī kashish se mire dil dariyā meñ

har-dam ik madd-o-jazar rahtā hai

tujh ko detā hai tirī zaat kā īqān agar merā vajūd

maiñ bhī tujh se tirī kirneñ le kar

apne qadmoñ ko jamā paatī huuñ

haañ tujhe rabb-e-azal

tā-abad yuuñ hī mire sar pe chamaktā rakkhe

merī maañ

umr-e-ravāñ kā ehsās

jab udasi dar-o-diwar pe chha jati hai

dil ke taron mein kahin sat suron ki mala

ek KHamosh chhanake se bikhar jati hai

jab main haalat ke baKHshe hue mayus andheron mein kahin dur bhaTak jati hun

hath ko hath sujhai nahin dene lagta

dil kisi zard sitare ka sawali ban kar

ghup andhere mein kisi rah ki nakaam talab karta hai

tab kahin KHizr-sifat chand nikal aata hai

shaKH-e-jaan par nai ummid ki kaliyan si mahak uThti hain

sans KHushbu se ladi jati hai

mujh pe chalta nahin phir ghor andheron ka tilism

ki mujhe us ki uluhi kirnen

KHud mein mahsur kiye rahti hain

chand ka nur ki mizrab ki manind meri zat ke sur

mujh ko lauTata hai ek pyar bhari lai ke sath

main bhi hansti hui duniya mein palaT aati hun

in palaTte hue lamhat ka eazaz mere chand tujhe hasil hai

teri din-raat ki gardish hai meri zat ke gird

aur ek teri kashish se mere dil dariya mein

har-dam ek madd-o-jazar rahta hai

tujh ko deta hai teri zat ka iqan agar mera wajud

main bhi tujh se teri kirnen le kar

apne qadmon ko jama pati hun

han tujhe rabb-e-azal

ta-abad yun hi mere sar pe chamakta rakkhe

meri man

umr-e-rawan ka ehsas