saqi

mirī mastī meñ bhī ab hosh hī kā taur hai saaqī

tire sāġhar meñ ye sahbā nahīñ kuchh aur hai saaqī

bhaḌaktī jā rahī hai dam-ba-dam ik aag sī dil meñ

ye kaise jaam haiñ saaqī ye kaisā daur hai saaqī

vo shai de jis se niiñd aa jaa.e aql-e-fitna-parvar ko

ki dil āzurda-e-tam.īz-e-lutf-o-jaur hai saaqī

kahīñ ik riñd aur vāmāñda-e-afkār tanhā.ī

kahīñ mahfil kī mahfil taur se be-taur hai saaqī

javānī aur yuuñ ghir jaa.e tūfān-e-havādis meñ

ḳhudā rakkhe abhī to be-ḳhudī kā daur hai saaqī

chhalaktī hai jo tere jaam se us mai kā kyā kahnā

tire shādāb hoñToñ kī magar kuchh aur hai saaqī

mujhe piine de piine de ki tere jām-e-lālīñ meñ

abhī kuchh aur hai kuchh aur hai kuchh aur hai saaqī

meri masti mein bhi ab hosh hi ka taur hai saqi

tere saghar mein ye sahba nahin kuchh aur hai saqi

bhaDakti ja rahi hai dam-ba-dam ek aag si dil mein

ye kaise jam hain saqi ye kaisa daur hai saqi

wo shai de jis se nind aa jae aql-e-fitna-parwar ko

ki dil aazurda-e-tamiz-e-lutf-o-jaur hai saqi

kahin ek rind aur wamanda-e-afkar tanhai

kahin mahfil ki mahfil taur se be-taur hai saqi

jawani aur yun ghir jae tufan-e-hawadis mein

KHuda rakkhe abhi to be-KHudi ka daur hai saqi

chhalakti hai jo tere jam se us mai ka kya kahna

tere shadab honTon ki magar kuchh aur hai saqi

mujhe pine de pine de ki tere jam-e-lalin mein

abhi kuchh aur hai kuchh aur hai kuchh aur hai saqi