sarangi

dam-sāz hazār dāstāñ hai

ye soz-o-gudāz kā jahāñ hai

nairang-e-surūr-o-shādmānī

har bol meñ ik na.ī kahānī

har taan pe aks aarzū kā

be-lafz maza hai guftugū kā

har sur kī sadā khanak rahī hai

lahje meñ dhanak lachak rahī hai

dhīmī sad-rang aañch lai kī

zinda tasvīr kaif-e-mai kī

pardoñ se nikal ke mauj-e-sargam

ḳhvāboñ ko jagā rahī hai paiham

āvāz ke zer-o-bam se mil ke

larzāñ haiñ tamām taar dil ke

rāgoñ ke jo daur chal rahe haiñ

yādoñ ke charāġh jal rahe haiñ

rakhtā hai nishāt-o-ġham pe qaabū

sangīt kā be-panāh jaadū

sangīn samāñ badal gayā hai

har dard ḳhushī meñ Dhal gayā hai

dam-saz hazar dastan hai

ye soz-o-gudaz ka jahan hai

nairang-e-surur-o-shadmani

har bol mein ek nai kahani

har tan pe aks aarzu ka

be-lafz maza hai guftugu ka

har sur ki sada khanak rahi hai

lahje mein dhanak lachak rahi hai

dhimi sad-rang aanch lai ki

zinda taswir kaif-e-mai ki

pardon se nikal ke mauj-e-sargam

KHwabon ko jaga rahi hai paiham

aawaz ke zer-o-bam se mil ke

larzan hain tamam tar dil ke

ragon ke jo daur chal rahe hain

yaadon ke charagh jal rahe hain

rakhta hai nishat-o-gham pe qabu

sangit ka be-panah jadu

sangin saman badal gaya hai

har dard KHushi mein Dhal gaya hai