sathi mere

sāthī mere

aao kuchh aur der merā saath nibhāo

sāhil-e-zindagī par chand qadam aur mere sang milāo

hijr kī tez surḳh āñdhī chal paḌī hai

aur merī in yatīm o bekas tanhā.iyoñ meñ

beva maañ kī tarah bain kartī pāgal havā.eñ boltī haiñ

maiñ sākit-o-jāmid khaḌī

ḳhāmosh lab bhīñche tujhe dekhtī huuñ

aur sochtī huuñ

kaash aisā ho

tū paḌh sake merī soch ko

haiñ bachīñ ab faqat chand musta.ār sāñseñ merī

nazar meñ bhī haiñ kuchh ajab sī dhundlāhaTeñ

zarb paḌ chukī hai naqqārā-e-kūch par

izrā.īl ne jakaḌ rakhī haiñ merī ye bāñheñ

maiñ had se ziyāda majbūr huuñ

tum to samajh jaao in majbūriyoñ ko

chalo is bahte vaqt ko amar banāo

saath mere chand aur sā.ateñ bitāo

aaj phir sang mere taare ginvāo

hai ab merā safar majāz se haqīqī kī jānib

ek alvidā'ī bosa

mere māthe par sabt karo

mujhe apnī is mohabbat se āzād karo

merī muTThiyoñ meñ haiñ bahut sī yādoñ ke jugnū

ka.ī rang-dār titliyoñ ke rang

mujhe in tamām yādoñ se āzād karo

ek baar muTThī khol kar mujhe uḌ jaane do

sāthī mere

bas itnā hī tumhārā merā saath thā

chalo ab tum vāpas lauT jaao

Dhalte sūraj kī nāranjī raushnī meñ

maiñ bhī lauT jaatī huuñ

ufuq ke us paar

dobāra milne ke liye

sathi mere

aao kuchh aur der mera sath nibhao

sahil-e-zindagi par chand qadam aur mere sang milao

hijr ki tez surKH aandhi chal paDi hai

aur meri in yatim o bekas tanhaiyon mein

bewa man ki tarah bain karti pagal hawaen bolti hain

main sakit-o-jamid khaDi

KHamosh lab bhinche tujhe dekhti hun

aur sochti hun

kash aisa ho

tu paDh sake meri soch ko

hain bachin ab faqat chand mustaar sansen meri

nazar mein bhi hain kuchh ajab si dhundlahaTen

zarb paD chuki hai naqqara-e-kuch par

izrail ne jakaD rakhi hain meri ye banhen

main had se ziyaada majbur hun

tum to samajh jao in majburiyon ko

chalo is bahte waqt ko amar banao

sath mere chand aur saaten bitao

aaj phir sang mere tare ginwao

hai ab mera safar majaz se haqiqi ki jaanib

ek alwida'i bosa

mere mathe par sabt karo

mujhe apni is mohabbat se aazad karo

meri muTThiyon mein hain bahut si yaadon ke jugnu

kai rang-dar titliyon ke rang

mujhe in tamam yaadon se aazad karo

ek bar muTThi khol kar mujhe uD jaane do

sathi mere

bas itna hi tumhaara mera sath tha

chalo ab tum wapas lauT jao

Dhalte suraj ki naranji raushni mein

main bhi lauT jati hun

ufuq ke us par

dobara milne ke liye