sathi

phuul kī ḳhushbū hañstī aa.ī

mere basere ko mahkāne

maiñ ḳhushbū meñ ḳhushbū mujh meñ

us ko maiñ jānūñ mujh ko vo jaane

mujh se chhū kar mujh meñ bas kar

is kī bahāreñ us ke zamāne

lākhoñ phūloñ kī mahkāreñ

rakhte haiñ gulshan vīrāne

mujh se alag haiñ mujh se judā haiñ

maiñ begāna vo begāne

un ko bikherā un ko uḌāyā

dast-e-ḳhizāñ ne mauj-e-sabā ne

bhūlā-bhaTkā nādāñ qatra

ā.ankhoñ kī putlī ko sajāne

aañsū ban kar dauḌā aayā

merī palkeñ us ke Thikāne

us kā thiraknā us kā taḌapnā

mere qisse mere fasāne

us kī hastī merī hastī

us ke motī mere ḳhazāne

baaqī saare gauhar-pāre

ḳhaak ke zarre ret ke daane

parbat kī ūñchī choTī se

dāman phailāyā jo ghaTā ne

ThanDī havā ke ThanDe jhoñke

be-ḳhud āvāra mastāne

apnī ThanDak le kar aa.e

merī aag meñ ghul-mil jaane

un kī hastī kā pairāhan

merī saañs ke tāne-bāne

un ke jhakole merī umañgeñ

un kī navā.eñ mere tarāne

baaqī saare tūfānoñ ko

jazb kiyā pahnā-e-fazā ne

fitrat kī ye gūnāgūnī

gulshan bin vaadī vīrāne

kāñTe kaliyāñ nuur añdherā

anjuman.en sham.eñ parvāne

lākhoñ shātir lākhoñ mohre

phaile haiñ shatranj ke ḳhāne

jāntā huuñ maiñ ye sab kyā haiñ

sahbā se ḳhālī paimāne

bhūkī miTTī ko sauñpe haiñ

duniyā ne apne nazrāne

jis ne merā dāman thāmā

aayā jo mujh meñ bas jaane

mere tūfānoñ meñ bahne

merī maujoñ meñ lahrāne

mere soz-e-dil kī lau se

apne man kī jot jagāne

ziist kī pahnā.ī meñ phaile

maut kī gīrā.ī ko na jaane

us kā barbat mere naġhme

us ke gesū mere shāne

merī nazreñ us kī duniyā

merī sāñseñ us ke zamāne

phul ki KHushbu hansti aai

mere basere ko mahkane

main KHushbu mein KHushbu mujh mein

us ko main jaanun mujh ko wo jaane

mujh se chhu kar mujh mein bas kar

is ki bahaaren us ke zamane

lakhon phulon ki mahkaren

rakhte hain gulshan virane

mujh se alag hain mujh se juda hain

main begana wo begane

un ko bikhera un ko uDaya

dast-e-KHizan ne mauj-e-saba ne

bhula-bhaTka nadan qatra

aaankhon ki putli ko sajaane

aansu ban kar dauDa aaya

meri palken us ke Thikane

us ka thirakna us ka taDapna

mere qisse mere fasane

us ki hasti meri hasti

us ke moti mere KHazane

baqi sare gauhar-pare

KHak ke zarre ret ke dane

parbat ki unchi choTi se

daman phailaya jo ghaTa ne

ThanDi hawa ke ThanDe jhonke

be-KHud aawara mastane

apni ThanDak le kar aae

meri aag mein ghul-mil jaane

un ki hasti ka pairahan

meri sans ke tane-bane

un ke jhakole meri umangen

un ki nawaen mere tarane

baqi sare tufanon ko

jazb kiya pahna-e-faza ne

fitrat ki ye gunaguni

gulshan bin wadi virane

kanTe kaliyan nur andhera

anjumanen shamen parwane

lakhon shatir lakhon mohre

phaile hain shatranj ke KHane

jaanta hun main ye sab kya hain

sahba se KHali paimane

bhuki miTTi ko saunpe hain

duniya ne apne nazrane

jis ne mera daman thama

aaya jo mujh mein bas jaane

mere tufanon mein bahne

meri maujon mein lahrane

mere soz-e-dil ki lau se

apne man ki jot jagane

zist ki pahnai mein phaile

maut ki girai ko na jaane

us ka barbat mere naghme

us ke gesu mere shane

meri nazren us ki duniya

meri sansen us ke zamane