sawan ka aaKHiri din

sāvan

terī bhīgī palkeñ

jhukī huī achchhī lagtī haiñ

Tap Tap girtī nirmal būñdeñ

shab bhar Tiin kī ThanDī chhat par

nāzuk sī poroñ se Type kartī huī

achchhī lagtī haiñ

ga.e dinoñ ke naam

mo.attar ḳhat likhtī achchhī lagtī haiñ

chhat ke niile kāġhaz ke nīche maiñ ḳhud bhī

jaise ik mailā sā korā kāġhaz huuñ

mere badan par

poroñ kī mīThī zarboñ se

lafzoñ ke saa.e utre haiñ

ḳhat ke saare shabd mujhe pahchān ga.e haiñ

kyā likkhā hai

kyā jānūñ maiñ kyā likkhā hai

kaun sī aisī anhonī sī baat thī jis ne

barsoñ pahle

na kahne ke pallū se ḳhud ko bāñdhā thā

aur phir dil kī Dolī meñ mahbūs huī thī

itne lambe bojhal sāloñ

ḳhud se bhī vo chhipī rahī thī

aaj use kis majbūrī ne

lafzoñ ke lab chhū lene par uksāyā hai

ga.e dinoñ ke naam ye naama likhvāyā hai

sāvan kā ye āḳhirī din hai

kal jab bhādoñ aa jā.egā

Tiin kī chhat par apne ujle par phailānā

aane vaalī surḳh rutoñ ke

ḳhvāboñ meñ jab kho jā.egā

sab āvāzeñ tham jā.eñgī

palkeñ thak kar so jā.eñgī

ga.e dinoñ kā naam

manoñ miTTī ke nīche dab jā.egā

aglā sāvan kab aa.egā

sawan

teri bhigi palken

jhuki hui achchhi lagti hain

Tap Tap girti nirmal bunden

shab bhar Tin ki ThanDi chhat par

nazuk si poron se Type karti hui

achchhi lagti hain

gae dinon ke nam

moattar KHat likhti achchhi lagti hain

chhat ke nile kaghaz ke niche main KHud bhi

jaise ek maila sa kora kaghaz hun

mere badan par

poron ki miThi zarbon se

lafzon ke sae utre hain

KHat ke sare shabd mujhe pahchan gae hain

kya likkha hai

kya jaanun main kya likkha hai

kaun si aisi anhoni si baat thi jis ne

barson pahle

na kahne ke pallu se KHud ko bandha tha

aur phir dil ki Doli mein mahbus hui thi

itne lambe bojhal salon

KHud se bhi wo chhipi rahi thi

aaj use kis majburi ne

lafzon ke lab chhu lene par uksaya hai

gae dinon ke nam ye nama likhwaya hai

sawan ka ye aaKHiri din hai

kal jab bhadon aa jaega

Tin ki chhat par apne ujle par phailana

aane wali surKH ruton ke

KHwabon mein jab kho jaega

sab aawazen tham jaengi

palken thak kar so jaengi

gae dinon ka nam

manon miTTi ke niche dab jaega

agla sawan kab aaega