صبا اکبر آبادی

مشاطگیٔ گیسوئے فن مدتوں ہوئی

آرائش عروس سخن مدتوں ہوئی

دست صبا فضائے ادب پر رہا محیط

تہذیب ساکنان چمن مدتوں ہوئی

تزئین بوستان وطن مدتوں ہوئی

اصناف شاعری نظر آتی ہیں بے اساس

فن رباعیات بھی ہے آج حرف یاس

اب مرثیہ بھی مرثیہ خوانی کیا کرے

حضرت صباؔ کی یاد میں ہے انجمن اداس

دوشیزۂ غزل کو ہے حد ادب کا پاس

اب تیز تر ہے دھوپ کوئی سائباں نہیں

جائیں کہاں طیور کوئی آشیاں نہیں

رک کر ملے پناہ بجھے تشنگی جہاں

رستے میں اپنے اب کوئی ایسا مکاں نہیں

شہر صباؔ میں اب کوئی پیر مغاں نہیں