saba-e-sahra

be-dāġh vus.atoñ kī āhū-e-be-bāk

tere ek hī mushk-bez jhoñke ne

yādoñ ke darīche khol diye haiñ

jhulastī dopahroñ meñ

ghane pīpal kī chhāñv meñ

jhūlā jhūltī ham-joliyāñ

ḳhush-gulū chāḌhe kī āvāz meñ

reg-zāroñ ke giit

kun ras hue jaate haiñ

barsāt kī ābnūsī raat kā manzar

khule āsmān tale baan kī ThanDī chārpā.ī par

chādar taan kar

dhule tāroñ kī jhilmilāhaT

dīd-ras huī jaatī hai

sāvan rut meñ giilī soñdhī maTkī mahkār

chaḌhī nahroñ kī salonī sāvanī thī mushk-bār

sub.hān terī qudrat kī

sadā.eñ bhī ajab thiiñ

Daal Daal ko ka.ī koyal kī

adā.eñ bhī ġhazab thiiñ

maiñ chashm-e-tasavvur se

un chuñdhiyā dene vaale raushniyoñ se

nazreñ bachā kar

is bazm-e-nashāt meñ jhāñk letī huuñ

ki

har shai apne asal ko DhūñDhtī hai

be-dagh wusaton ki aahu-e-be-bak

tere ek hi mushk-bez jhonke ne

yaadon ke dariche khol diye hain

jhulasti dopahron mein

ghane pipal ki chhanw mein

jhula jhulti ham-joliyan

KHush-gulu chaDhe ki aawaz mein

reg-zaron ke git

kun ras hue jate hain

barsat ki aabnusi raat ka manzar

khule aasman tale ban ki ThanDi chaarpai par

chadar tan kar

dhule taron ki jhilmilahaT

did-ras hui jati hai

sawan rut mein gili sondhi maTki mahkar

chaDhi nahron ki saloni sawani thi mushk-bar

subhan teri qudrat ki

sadaen bhi ajab thin

Dal Dal ko kai koyal ki

adaen bhi ghazab thin

main chashm-e-tasawwur se

un chundhiya dene wale raushniyon se

nazren bacha kar

is bazm-e-nashat mein jhank leti hun

ki

har shai apne asal ko DhunDhti hai