sach bata

ai ḳhudā

kaise maiñ mānūñ ki miTTī se banī hai maañ bhī

ḳhaak to faanī hai miT jaatī hai

aur lā-fānī ko faanī maiñ kaise mānūñ

sach batā kaun chhupā hai is meñ

zarf-e-insān meñ vus.at ye kahāñ se aa.e

vahī ulfat vahī shafqat vahī parda-poshī

ye to sifateñ haiñ tirī

maiñ to hairān huuñ ik saada sī laḌkī kyūñ-kar

haft-aflāk ko chhū letī hai maañ bante hī

vo jo ik nuur nihāñ sub.h-e-azal tū ne kiyā thā is meñ

karb-e-taḳhlīq jagātā hai jise

vo phir dard kī āḳhirī had ko chhū kar

har sū vo nuur bikhar jaatā hai

nuur hī nuur se har ang rachā hotā hai

ḳhaak kā ḳhol faqat dhoka hai

vo to sayyāl mohabbat hai jo gardish meñ hai

dard aur soz base hote haiñ ik ik nas meñ

gosht aur post faqat parda hai

maañ to tamsīl hai jannat kī tirī

vahī vus.at vahī ThanDak

aur vahī duudh kī shīrīñ nahreñ

maañ to tafsīr hai ulfat kī tirī

apnī maḳhlūq se had apnī mohabbat kī jatāne ke liye

maañ kī mamtā ko hī paimāna banāyā tū ne

sach batā kaun chhupā hai is meñ

sach batā bhed ye kyoñ tū ne chhupā rakkhā hai

ai KHuda

kaise main manun ki miTTi se bani hai man bhi

KHak to fani hai miT jati hai

aur la-fani ko fani main kaise manun

sach bata kaun chhupa hai is mein

zarf-e-insan mein wusat ye kahan se aae

wahi ulfat wahi shafqat wahi parda-poshi

ye to sifaten hain teri

main to hairan hun ek sada si laDki kyun-kar

haft-aflak ko chhu leti hai man bante hi

wo jo ek nur nihan subh-e-azal tu ne kiya tha is mein

karb-e-taKHliq jagata hai jise

wo phir dard ki aaKHiri had ko chhu kar

har su wo nur bikhar jata hai

nur hi nur se har ang racha hota hai

KHak ka KHol faqat dhoka hai

wo to sayyal mohabbat hai jo gardish mein hai

dard aur soz base hote hain ek ek nas mein

gosht aur post faqat parda hai

man to tamsil hai jannat ki teri

wahi wusat wahi ThanDak

aur wahi dudh ki shirin nahren

man to tafsir hai ulfat ki teri

apni maKHluq se had apni mohabbat ki jatane ke liye

man ki mamta ko hi paimana banaya tu ne

sach bata kaun chhupa hai is mein

sach bata bhed ye kyon tu ne chhupa rakkha hai