sach hasin hai

kab se jaane kab se

shāyad sadiyoñ se

insān yahī kahtā aayā hai

dil ko haTā kar

bahut se dhoke us ne apnī 'aql se khaa.e

ik dhoka ye bhī khāyā hai

vo kahtā hai sach bad-sūrat

āñkhoñ meñ ḳhuuñ

daañt baḌe aur laal zabāñ bāhar ko niklī

ik aisī patthar kī mūrat

sach bad-sūrat

lekin yaaro ġhaur se dekho

sub.h kā honā bhī ik sach hai

āsmān meñ raat kī devī kā rozāna

taare bonā bhī ik sach hai

chāñdnī raat kī chāñdī bhī ik sachchā.ī hai

sūraj kī kirnoñ kā sonā bhī ik sach hai

yahāñ bhī dekho vahāñ bhī dekho

sach hai husn jahāñ bhī dekho

husn hai sach kā konā konā

husn kī zid bad-sūrat honā

to phir sach bad-sūrat kaise

yā'nī kuchh jhūToñ ne mil kar

jhūTh ko ab tak itnā bolā

aaj hameñ vo sach lagtā hai

jo kaḌvā aur bad-sūrat hai

aao is mīzān meñ rakh kar

sach aur jhūTh kī hai.at toleñ

ho saktā hai jhūTh lage duniyā ko lekin

himmat kar ke ye sach boleñ

kab se jaane kab se

shayad sadiyon se

insan yahi kahta aaya hai

dil ko haTa kar

bahut se dhoke us ne apni 'aql se khae

ek dhoka ye bhi khaya hai

wo kahta hai sach bad-surat

aankhon mein KHun

dant baDe aur lal zaban bahar ko nikli

ek aisi patthar ki murat

sach bad-surat

lekin yaro ghaur se dekho

subh ka hona bhi ek sach hai

aasman mein raat ki dewi ka rozana

tare bona bhi ek sach hai

chandni raat ki chandi bhi ek sachchai hai

suraj ki kirnon ka sona bhi ek sach hai

yahan bhi dekho wahan bhi dekho

sach hai husn jahan bhi dekho

husn hai sach ka kona kona

husn ki zid bad-surat hona

to phir sach bad-surat kaise

ya'ni kuchh jhuTon ne mil kar

jhuTh ko ab tak itna bola

aaj hamein wo sach lagta hai

jo kaDwa aur bad-surat hai

aao is mizan mein rakh kar

sach aur jhuTh ki haiat tolen

ho sakta hai jhuTh lage duniya ko lekin

himmat kar ke ye sach bolen