sach kahna hai

ai taḳht-nashīñ logo tum ne

ye kaisā mulk banā Daalā

har hisse meñ hai zaḳhm bahut

har shakl pe mātam chhāyā hai

qatra-qatra ḳhuuñ bahtā hai

reza-reza sab marte haiñ

har lamha ik Dar rahtā hai

koī saayā jaane kahāñ se

aa dhamke phir khā hī jaa.e

ham Darte haiñ sab Darte haiñ

sab kā Darnā lāzim bhī hai

in kamroñ meñ chīḳh rahī hai

sach kahne vaalī ḳhāmoshī

sach sun ne vaalī ik aadat

sach likhne vaale kuchh pāgal

haiñ zabt kahīñ par log yahāñ

koī khoje āḳhir un ko

haañ un logoñ meñ himmat hai

topoñ ke aage rakh deñge

kuchh giit kahānī nazm qalam

kuchh dīvāreñ potī jā.eñgī

kuchh va.ade likkhe jā.eñge

vo dahshat toḌī jā.egī

kuchh putle phūñke jā.eñge

Daflī pe raag banegī phir

tab ek mash.al jalegī phir

zanjīreñ talvāreñ topeñ

ye sab ġhā.eb ho jā.eñgī

ham phir se tab muskā.eñge

ham phir se sach kah pā.eñge

ai taKHt-nashin logo tum ne

ye kaisa mulk bana Dala

har hisse mein hai zaKHm bahut

har shakl pe matam chhaya hai

qatra-qatra KHun bahta hai

reza-reza sab marte hain

har lamha ek Dar rahta hai

koi saya jaane kahan se

aa dhamke phir kha hi jae

hum Darte hain sab Darte hain

sab ka Darna lazim bhi hai

in kamron mein chiKH rahi hai

sach kahne wali KHamoshi

sach sun ne wali ek aadat

sach likhne wale kuchh pagal

hain zabt kahin par log yahan

koi khoje aaKHir un ko

han un logon mein himmat hai

topon ke aage rakh denge

kuchh git kahani nazm qalam

kuchh diwaren poti jaengi

kuchh wade likkhe jaenge

wo dahshat toDi jaegi

kuchh putle phunke jaenge

Dafli pe rag banegi phir

tab ek mashal jalegi phir

zanjiren talwaren topen

ye sab ghaeb ho jaengi

hum phir se tab muskaenge

hum phir se sach kah paenge