sach kaho sach kaho hamesha sach

sach kaho sach kaho hamesha sach

hai bhale mānasoñ kā pesha sach

sach kahoge to tum rahoge aziiz

sach to ye hai ki sach hai achchhī chiiz

sach kahoge to tum rahoge shaad

fikr se paak ranj se āzād

sach kahoge to tum rahoge diler

jaise Dartā nahīñ dilāvar sher

sach se rahtī hai taqviyat dil ko

sahl kartā hai saḳht mushkil ko

jis ko sach bolne kī aadat hai

vo baḌā nek bā-sa.ādat hai

sach hai saare muāmloñ kī jaan

sach se rahtā hai dil ko itmīnān

sach meñ rāhat hai aur āsānī

sach se hotī nahīñ pashemānī

sach hai duniyā meñ nekiyoñ kī jaḌ

sach na ho to jahān jaa.e ujaḌ

sach kahoge to dil rahegā saaf

sach se ho jā.eñge qusūr muaaf

sach se zinhār dar-guzar na karo

dil meñ kuchh ḳhauf aur ḳhatar na karo

vahī daanā hai jo ki hai sachchā

is meñ būḌhā ho yā koī bachchā

hai burā jhuuT bolne vaalā

aap kartā hai apnā muñh kaalā

fā.eda us ko kuchh na degā jhuuT

jā.egā ek roz bhāñDā phuuT

jhuuT kī bhuul kar na Daalo ḳhū

jhuuT zillat kī baat hai aḳh thū

sach kaho sach kaho hamesha sach

hai bhale manason ka pesha sach

sach kahoge to tum rahoge aziz

sach to ye hai ki sach hai achchhi chiz

sach kahoge to tum rahoge shad

fikr se pak ranj se aazad

sach kahoge to tum rahoge diler

jaise Darta nahin dilawar sher

sach se rahti hai taqwiyat dil ko

sahl karta hai saKHt mushkil ko

jis ko sach bolne ki aadat hai

wo baDa nek ba-saadat hai

sach hai sare muamlon ki jaan

sach se rahta hai dil ko itminan

sach mein rahat hai aur aasani

sach se hoti nahin pashemani

sach hai duniya mein nekiyon ki jaD

sach na ho to jahan jae ujaD

sach kahoge to dil rahega saf

sach se ho jaenge qusur muaf

sach se zinhaar dar-guzar na karo

dil mein kuchh KHauf aur KHatar na karo

wahi dana hai jo ki hai sachcha

is mein buDha ho ya koi bachcha

hai bura jhuT bolne wala

aap karta hai apna munh kala

faeda us ko kuchh na dega jhuT

jaega ek roz bhanDa phuT

jhuT ki bhul kar na Dalo KHu

jhuT zillat ki baat hai aKH thu