sada ba-sahra

ye duur duur murādoñ ke retīle Tiile

sarak sarak ke jo dāman badalte rahte haiñ

ye murda uuñT jo sahrā ke zard rañgoñ meñ

kisī ne dasht-e-talab meñ sajā ke rakkhe haiñ

ki jo bhī bhes badal kar idhar ravāna ho

palaT hī jaa.e vo le kar phaTī phaTī āñkheñ

ye kis kī vaadī hai ye uuñT kis ke haiñ

ye kaun zard-nigārish kā itnā shā.eq hai

ye kaun qais hai kis dasht ke sarāb meñ hai

ye kis kā ḳhvāb hai kis husn ke azaab meñ hai

junūñ meñ Duub ke dil ne pukārā naam apnā

jhaTak ke sar ko tamannā ne chīḳh dohrā.ī

ḳhayāl ḳhvāb ke dāman meñ chauñk chauñk uThā

ye merā naam thā dil kā yā merī lailā kā

mirī tamannā thī dil kī yā merī lailā kī

ye chīḳh sar kī jhaTak aur ḳhvāb kis ke the

palaT hī jaao na le kar phaTī phaTī āñkheñ

ye dur dur muradon ke retile Tile

sarak sarak ke jo daman badalte rahte hain

ye murda unT jo sahra ke zard rangon mein

kisi ne dasht-e-talab mein saja ke rakkhe hain

ki jo bhi bhes badal kar idhar rawana ho

palaT hi jae wo le kar phaTi phaTi aankhen

ye kis ki wadi hai ye unT kis ke hain

ye kaun zard-nigarish ka itna shaeq hai

ye kaun qais hai kis dasht ke sarab mein hai

ye kis ka KHwab hai kis husn ke azab mein hai

junun mein Dub ke dil ne pukara nam apna

jhaTak ke sar ko tamanna ne chiKH dohrai

KHayal KHwab ke daman mein chaunk chaunk uTha

ye mera nam tha dil ka ya meri laila ka

meri tamanna thi dil ki ya meri laila ki

ye chiKH sar ki jhaTak aur KHwab kis ke the

palaT hi jao na le kar phaTi phaTi aankhen