sada ba-sahra

sakhī phir aa ga.ī rut jhūlne kī gungunāne kī

siyah āñkhoñ kī tah meñ bijliyoñ ke Duub jaane kī

subuk hāthoñ se mehñdī kī harī shāḳheñ jhukāne kī

lagan meñ rañg āñchal meñ dhanak ke muskurāne kī

umañgoñ ke subū se qatra qatra mai Tapakne kī

ghanere gesuoñ meñ adh-khilī kaliyāñ sajāne kī

bayābāñ sabza-e-nau-ḳhez se ābād hote haiñ

sakhī tum bhī jo dil apnā basā letīñ to kyā hotā

hayā hai ḳhauf hai pindār hai zid hai ye kyā shai hai

hamesha iltijā.eñ rā.egāñ jaatī rahīñ merī

kabhī merī ḳhushī kī bhī duā letīñ to kyā hotā

ye kaisī āgahī hai jis kī mash.al haath meñ le kar

sadā tanhā.iyoñ ke des meñ phirtī ho āvāra

ye ik bīm-e-shikast-e-ḳhvāb ye chhū luuñ to kyā hogā

usī se ho ga.ī har ishrat-e-maujūd sad paara

ba-juz ik rūh-e-nālāñ chashm-e-hairāñ umr-e-sar-gardāñ

nahīñ taqsīr-e-parvāz-e-nazar kā koī kaffāra

qarār-e-qalb-zār-e-hind vār-e-barnā.ī-e-yūnāñ

tājllī-e-āl-e-ibrāhīm par paiham jo utrī thī

taḌaptā sho.ala-gūñ ḳhuuñ jāhiliyat kī navāoñ kā

chamak reg-e-ravāñ kī sar-bulandī naḳhl-e-sahrā kī

dayār-e-'hāfiz'-o-'ḳhayyām' kī uḌtī huī ḳhushbū

nigāh-e-'ġhālib'-o-'iqbāl kī getī-shikan mastī

surūr-e-justajū maġhrib kī matvālī havāoñ kā

sabhī paayā magar darmān-e-dard bebasī mushkil

ye ik āsūdgī chehre pe ye Thahrāv āñkhoñ meñ

ye ashkoñ se bharī chhāgal ye be-parda-o-ḳhud-sar dil

chaTāneñ dahr kī ātish ko chhū kar bhī nahīñ pighlīñ

na jaane kaun se ajzā haiñ is uftād meñ shāmil

ye nirmal jal kā chashma ye dil-e-be-qaid-o-be-pāyāñ

use bhī samt miltī us kī bhī ik rahguzar hotī

shabāb apne jalāl-e-hashr-sāmāñ kī qasam khātā

sharāfat be-zabāñ fitrat ke dukh kī chāragar hotī

na hotī aarzū nairañg-e-hastī kī tamāshā.ī

vo us baḌhte humakte kārvāñ kī ham-safar hotī

sakhi phir aa gai rut jhulne ki gungunane ki

siyah aankhon ki tah mein bijliyon ke Dub jaane ki

subuk hathon se mehndi ki hari shaKHen jhukane ki

lagan mein rang aanchal mein dhanak ke muskurane ki

umangon ke subu se qatra qatra mai Tapakne ki

ghanere gesuon mein adh-khili kaliyan sajaane ki

bayaban sabza-e-nau-KHez se aabaad hote hain

sakhi tum bhi jo dil apna basa letin to kya hota

haya hai KHauf hai pindar hai zid hai ye kya shai hai

hamesha iltijaen raegan jati rahin meri

kabhi meri KHushi ki bhi dua letin to kya hota

ye kaisi aagahi hai jis ki mashal hath mein le kar

sada tanhaiyon ke des mein phirti ho aawara

ye ek bim-e-shikast-e-KHwab ye chhu lun to kya hoga

usi se ho gai har ishrat-e-maujud sad para

ba-juz ek ruh-e-nalan chashm-e-hairan umr-e-sar-gardan

nahin taqsir-e-parwaz-e-nazar ka koi kaffara

qarar-e-qalb-zar-e-hind war-e-barnai-e-yunan

tajlli-e-al-e-ibrahim par paiham jo utri thi

taDapta shoala-gun KHun jahiliyat ki nawaon ka

chamak reg-e-rawan ki sar-bulandi naKHl-e-sahra ki

dayar-e-'hafiz'-o-'KHayyam' ki uDti hui KHushbu

nigah-e-'ghaalib'-o-'iqbaal ki geti-shikan masti

surur-e-justaju maghrib ki matwali hawaon ka

sabhi paya magar darman-e-dard bebasi mushkil

ye ek aasudgi chehre pe ye Thahraw aankhon mein

ye ashkon se bhari chhagal ye be-parda-o-KHud-sar dil

chaTanen dahr ki aatish ko chhu kar bhi nahin pighlin

na jaane kaun se ajza hain is uftad mein shamil

ye nirmal jal ka chashma ye dil-e-be-qaid-o-be-payan

use bhi samt milti us ki bhi ek rahguzar hoti

shabab apne jalal-e-hashr-saman ki qasam khata

sharafat be-zaban fitrat ke dukh ki chaaragar hoti

na hoti aarzu nairang-e-hasti ki tamashai

wo us baDhte humakte karwan ki ham-safar hoti