sada-e-jawedan

vāhime kī siskiyāñ chāroñ taraf

aur un meñ ik sadā sab se alag

jaise sahrā meñ gulāb

tīrgī meñ jaise ubhre māhtāb

maut kī parchhā.iyoñ meñ jaise raushan zindagānī kī lakīr

munkiroñ ke darmiyāñ jaise masīh

jaise biptā meñ ghire insān ko

apne murshid kā mile āshīrvād

kaurvoñ ke dal kā narġha aur is meñ jaise krishn

bāñsurī kī mohne vaalī sadā

halkī halkī dhīmī dhīmī kaif-zā

ye sadā hai azm-e-insāñ kā payām

azm-e-insāñ kī sadā āfāqiyat

azm-e-insāñ kī sadā lā-fāniyat

azm-e-insāñ kī sadā jamhūriyat

ye sadā hai ik navā-e-dil-sitāñ

ye sadā aflāk meñ parcham-fashāñ

ye sadā māhaul meñ har-dam ravāñ

ye sadā har dil kī dhaḌkan se ayaañ

ye sadā hai ruuh jo hai jāvedāñ

jism martā hai sadā martī nahīñ

wahime ki siskiyan chaaron taraf

aur un mein ek sada sab se alag

jaise sahra mein gulab

tirgi mein jaise ubhre mahtab

maut ki parchhaiyon mein jaise raushan zindagani ki lakir

munkiron ke darmiyan jaise masih

jaise bipta mein ghire insan ko

apne murshid ka mile aashirwad

kaurwon ke dal ka nargha aur is mein jaise krishn

bansuri ki mohne wali sada

halki halki dhimi dhimi kaif-za

ye sada hai azm-e-insan ka payam

azm-e-insan ki sada aafaqiyat

azm-e-insan ki sada la-faniyat

azm-e-insan ki sada jamhuriyat

ye sada hai ek nawa-e-dil-sitan

ye sada aflak mein parcham-fashan

ye sada mahaul mein har-dam rawan

ye sada har dil ki dhaDkan se ayan

ye sada hai ruh jo hai jawedan

jism marta hai sada marti nahin