sadhae hue parinde

savāl bachche ne jo kiye the

javāb un kā dabī zabāñ se vahī diyā hai jo mujh ko ajdād se milā thā

vahī purāne savāl us ke

zamīñ agar ḳhaam hai to us par hamāre puḳhta makān kyuuñ haiñ?

agar gulāboñ ko rañg ḳhurshīd se milā hai

to dhuup kā husn kaun se phuul kī atā hai?

vahī purāne savāl us ke

vahī purānā javāb merā

vahī girah vārid-e-chaman kī sadā-e-parvāz par lagā dī hai

jis kā halqa mirī zabāñ par paḌā huā hai

mujhe yaqīñ hai ki ye nayā ham-safīr merā

mirī tarah se zamīñ ke shīshe kī shash-jihat se na aage parvāz kar sakegā

vo ek mīThī sadā kī naddī

jo raat din kī jalī zamīnoñ se duur sarsabz jañgaloñ meñ ravāñ hai naġhme

koī sadhāyā huā parinda na us ke sar-basta sāhiloñ par utar sakegā

sawal bachche ne jo kiye the

jawab un ka dabi zaban se wahi diya hai jo mujh ko ajdad se mila tha

wahi purane sawal us ke

zamin agar KHam hai to us par hamare puKHta makan kyun hain?

agar gulabon ko rang KHurshid se mila hai

to dhup ka husn kaun se phul ki ata hai?

wahi purane sawal us ke

wahi purana jawab mera

wahi girah warid-e-chaman ki sada-e-parwaz par laga di hai

jis ka halqa meri zaban par paDa hua hai

mujhe yaqin hai ki ye naya ham-safir mera

meri tarah se zamin ke shishe ki shash-jihat se na aage parwaz kar sakega

wo ek miThi sada ki naddi

jo raat din ki jali zaminon se dur sarsabz jangalon mein rawan hai naghme

koi sadhaya hua parinda na us ke sar-basta sahilon par utar sakega