safa marwa

safā marva

safā-o-marva ke darmiyāñ dauḌtī umañgo

tumheñ ḳhabar hai

tumhāre ajdād ke nuqūsh-e-barahna-pā.ī

tumhāre qadmoñ ke naqsh-gar haiñ

tum apne qadmoñ kī pairvī meñ ravāñ-davāñ ho

ḳhud apnā irfān DhūñDte ho

hujūm meñ chal ke apnī baqā kā sāmān DhūñDte ho

diloñ ke asnām reza reza

tum apne qadmoñ pe chal rahe ho

diloñ ke andar chhupe butoñ ko miTā rahe ho

diloñ ke andar chhupe darindoñ ko sañg-e-sabr-o-ġhinā se

karte ho paash paash

aur chal rahe ho

hisār-e-shab meñ ravāñ ho kab se

tum apnā ḳhud kārvāñ ho kab se

magar shayātīñ tumhāre andar jo bas rahe haiñ

vo kab miTeñge

tumhāre naqsh-e-qadam kab apnī anā ke but

toḌ kar hujūm-e-musāfirāñ ke

rafīq hoñge

tum apne ajdād hī ke naqsh-e-qadam pe chalte rahoge

aur phir ye bhī jaan loge

ki ye tumhāre hī naqsh-e-pā hai

tumhāre a.amāl kī jazā haiñ

tumhārī taqdīr kā sila haiñ

tumhārī sa.ī kī intihā haiñ

safa marwa

safa-o-marwa ke darmiyan dauDti umango

tumhein KHabar hai

tumhaare ajdad ke nuqush-e-barahna-pai

tumhaare qadmon ke naqsh-gar hain

tum apne qadmon ki pairwi mein rawan-dawan ho

KHud apna irfan DhunDte ho

hujum mein chal ke apni baqa ka saman DhunDte ho

dilon ke asnam reza reza

tum apne qadmon pe chal rahe ho

dilon ke andar chhupe buton ko miTa rahe ho

dilon ke andar chhupe darindon ko sang-e-sabr-o-ghina se

karte ho pash pash

aur chal rahe ho

hisar-e-shab mein rawan ho kab se

tum apna KHud karwan ho kab se

magar shayatin tumhaare andar jo bas rahe hain

wo kab miTenge

tumhaare naqsh-e-qadam kab apni ana ke but

toD kar hujum-e-musafiran ke

rafiq honge

tum apne ajdad hi ke naqsh-e-qadam pe chalte rahoge

aur phir ye bhi jaan loge

ki ye tumhaare hi naqsh-e-pa hai

tumhaare aamal ki jaza hain

tumhaari taqdir ka sila hain

tumhaari sai ki intiha hain