safar aur ham-safar

jañgal jañgal aag lagī hai bastī bastī vīrāñ hai

khetī khetī raakh uḌtī hai duniyā hai ki bayābāñ hai

sannāTe kī haibat ne sāñsoñ meñ pukāreñ bhar dī haiñ

zehnoñ meñ mab.hūt ḳhayāloñ ne talvāreñ bhar dī haiñ

qadam qadam par jhulse jhulse ḳhvāb paḌe haiñ rāhoñ meñ

sub.h ko jaise kaale kaale diye ibādat-gāhoñ meñ

ek ik sañg-e-mīl meñ kitnī āñkheñ haiñ pathrā.ī huī

ek ik naqsh-e-qadam meñ kitnī raftāreñ kafnā.ī huī

ham-safro ai ham-safro kuchh aur bhī nazdīk aa ke chalo

jab chalnā hī muqaddar Thahrā haath meñ haath milā ke chalo

jangal jangal aag lagi hai basti basti viran hai

kheti kheti rakh uDti hai duniya hai ki bayaban hai

sannaTe ki haibat ne sanson mein pukaren bhar di hain

zehnon mein mabhut KHayalon ne talwaren bhar di hain

qadam qadam par jhulse jhulse KHwab paDe hain rahon mein

subh ko jaise kale kale diye ibaadat-gahon mein

ek ek sang-e-mil mein kitni aankhen hain pathrai hui

ek ek naqsh-e-qadam mein kitni raftaren kafnai hui

ham-safro ai ham-safro kuchh aur bhi nazdik aa ke chalo

jab chalna hi muqaddar Thahra hath mein hath mila ke chalo