safar aur qaid mein ab ki dafa kya hua

maiñ ne ek sāhil se ek siipī uThā.ī

aur apne aañsū ko us meñ band kar ke

duur gahre samundar meñ pheñk diyā

maiñ ne apne hāthoñ par

ik tez chhurī se

lambe safar kī lakīr banā.ī

aur aise juute ḳharīde

jo chalte hue pairoñ ko hamesha zaḳhmī rakhte haiñ

ab kī daf.a maiñ ne ghar banāyā hai

aise shīshoñ kā

jin meñ sirf andar kā aks rahtā hai

aur aisī aag kā

jo zarūrat paḌne par ḳhud hī jal uThtī hai

aur aisī havā kā

jis ke liye koī darvāza kholne kī zarūrat nahīñ

aur aisī chīzoñ kā

jo apnī apnī jagah par farsh se juḌī huī haiñ

maiñ ne apne mausamoñ ko churā liyā hai

aur ghaas ke maidānoñ ko

registānoñ ko āsmānoñ ko

maiñ ne ek titlī ko ek kitāb meñ chhupā liyā hai

aur ik ḳhvāb ko āñkhoñ meñ

aur mohabbat ko jānñe ke liye

maiñ ne

ek nazm paḌhī hai

aur āvāz ke liye

ik giit gaayā hai

maiñ ne ghup añdhere meñ

āñkheñ band kar ke

ghar ke shīshoñ meñ

ḳhud ko dekhā hai

aur yaad kiyā hai

ek aadmī ko

jo gahre samundar meñ

vo siipī DhūñDne utar gayā

jis meñ maiñ ne apnā aañsū qaid kar ke pheñkā thā

main ne ek sahil se ek sipi uThai

aur apne aansu ko us mein band kar ke

dur gahre samundar mein phenk diya

main ne apne hathon par

ek tez chhuri se

lambe safar ki lakir banai

aur aise jute KHaride

jo chalte hue pairon ko hamesha zaKHmi rakhte hain

ab ki dafa main ne ghar banaya hai

aise shishon ka

jin mein sirf andar ka aks rahta hai

aur aisi aag ka

jo zarurat paDne par KHud hi jal uThti hai

aur aisi hawa ka

jis ke liye koi darwaza kholne ki zarurat nahin

aur aisi chizon ka

jo apni apni jagah par farsh se juDi hui hain

main ne apne mausamon ko chura liya hai

aur ghas ke maidanon ko

registanon ko aasmanon ko

main ne ek titli ko ek kitab mein chhupa liya hai

aur ek KHwab ko aankhon mein

aur mohabbat ko jaanne ke liye

main ne

ek nazm paDhi hai

aur aawaz ke liye

ek git gaya hai

main ne ghup andhere mein

aankhen band kar ke

ghar ke shishon mein

KHud ko dekha hai

aur yaad kiya hai

ek aadmi ko

jo gahre samundar mein

wo sipi DhunDne utar gaya

jis mein main ne apna aansu qaid kar ke phenka tha