safar-e-raegan

zindagī ke safar meñ ka.ī moḌ haiñ

aur ka.ī rāste

anginat manzileñ

jis pe insān be-rāh-ravī kā shikār

roz-e-avval se hai

saikḌoñ rahnumā aa.e tablīġh kī

rāh-e-haq kī magar

rāhgīroñ ko dushvārī dar-pesh hai

har qadam par yahāñ

aisī dushvārī jis kā mudāvā nahīñ

anginat ḳhvāhisheñ aur sapne liye

dar-ba-dar Thokareñ khātā thaktā nahīñ hai ye insān

jis ko ḳhudā ne ḳhalīfa banāyā

ḳhilāfat 'atā kī

magar is navāzish pe kab mutma.in hai

ye insān āḳhir

vahī apne sapne liye phir rahā hai

vo sapne ki tā'bīr jin kī na koī na koī haqīqat

faqat ek dhun hai

usī dhun meñ chaltā chalā jā rahā hai

usī raah par aur usī manziloñ kī taraf

jis kā koī nishāñ hai na koī pata hai

zindagi ke safar mein kai moD hain

aur kai raste

anginat manzilen

jis pe insan be-rah-rawi ka shikar

roz-e-awwal se hai

saikDon rahnuma aae tabligh ki

rah-e-haq ki magar

rahgiron ko dushwari dar-pesh hai

har qadam par yahan

aisi dushwari jis ka mudawa nahin

anginat KHwahishen aur sapne liye

dar-ba-dar Thokaren khata thakta nahin hai ye insan

jis ko KHuda ne KHalifa banaya

KHilafat 'ata ki

magar is nawazish pe kab mutmain hai

ye insan aaKHir

wahi apne sapne liye phir raha hai

wo sapne ki ta'bir jin ki na koi na koi haqiqat

faqat ek dhun hai

usi dhun mein chalta chala ja raha hai

usi rah par aur usi manzilon ki taraf

jis ka koi nishan hai na koi pata hai