safar hi aadarsh ka safar hai

aaj bhī raat sone se pahle

mere beTe ne mujh se kahā maiñ use koī achchhī kahānī sunā.ūñ

to maiñ ne use ek dilkash jazīre meñ achchhe guzarte dinoñ kī kahānī sunā.ī

jo mujh se mire baap ne ye kahī aur is ne virāsat meñ is dāstān ko sunā

ham ne bachpan meñ sar-sabz-o-shādāb niile jazīre meñ pariyoñ phaloñ aur phūloñ

chahaktī huī bulbuloñ kī kahānī sunī thī

jazīra samundar kī āzād lahreñ jahāñ nāchtī haiñ

jahāñ aman hī aman hai chiin hī chiin hai

har nayā din bashārat kī bārāt ban kar utartā hai

merā beTā jo soyā huā hai kahīñ titliyoñ ke ta.āqub meñ bechain hai

ham sabhī aañkh mūñde hue titliyoñ ke tukka kab be bechain haiñ

ki shāyad añdhere meñ lipTe hue sabz bāġhoñ ke qisse ye niilā jazīra

kitāboñ meñ dānish kī har lauh par ġhair mafhūm alfāz haiñ

ka.ī manchale manchaloñ ke giroh is jazīre ke lambe safar par ga.e aur palaT kar na aa.e

merā beTā jo soyā huā titliyoñ ke tukka kab be bechain hai

maiñ use bhī safar par gayā aur palaT kar na aatā huā dekhtā huuñ

ham ne sadiyoñ se paañv ko hāthoñ ko sīnoñ ko be-dard meḳhoñ se chhalnī kiyā

aur lahū kī tarah surḳh lohe se apnī zabānoñ ko dāġhā

magar vo jazīra pahāḌoñ kī jānib safar thā

ki chalte to vo duur hī duur jaatā

Thaharte to jaise vo nazdīk aatā

yūñhī nasl dar nasl ham ne añdhere meñ lipTe hue in jazīroñ kī bāteñ kahīñ

aur un jhuuT kī jhālroñ hāshiyoñ ko uThā.e rakkhā

nasl-dar-nasl ham qāfila qāfila bail kañdhe badalte hasīñ jhuuT kī ye salībeñ uThāte rahe

maiñ ki jāmid zehānat kā qaa.il nahīñ

ham ne apne se pahlūñ ke ilm o farāsat kī tashrīh o tāvīl meñ apnī rag rag se

saarī zehānat ko ġhārat kiyā

ham ne apne buzurgoñ kī ḳhiffat miTāne chhupāne kī ḳhātir lahū momyā.ī kiyā

kisī ne kahā vo jazīra samundar ke is paar hai

aur ham nasl-dar-nasl Duubī huī kashtiyāñ ban ga.e

kisī ne kahā vo jazīra ufuq se pare āḳhirī fāsle ke dho.eñ meñ chhupā hai

aur ham qahr sahrā meñ bārāt bardār TuuTā huā qāfila ban ga.e

magar vo jazīra ajab daldaloñ kā safar hai

ki sau kos jaa.eñ to jaise faqat do qadam hī chale haiñ

magar vo jazīra pahāḌoñ kī jānib safar hai

ki jaa.eñ to vo duur hī duur jaa.e

jo Thahreñ to jaise vo nazdīk aa.e

aaj bhi raat sone se pahle

mere beTe ne mujh se kaha main use koi achchhi kahani sunaun

to main ne use ek dilkash jazire mein achchhe guzarte dinon ki kahani sunai

jo mujh se mere bap ne ye kahi aur is ne wirasat mein is dastan ko suna

hum ne bachpan mein sar-sabz-o-shadab nile jazire mein pariyon phalon aur phulon

chahakti hui bulbulon ki kahani suni thi

jazira samundar ki aazad lahren jahan nachti hain

jahan aman hi aman hai chin hi chin hai

har naya din bashaarat ki baraat ban kar utarta hai

mera beTa jo soya hua hai kahin titliyon ke taaqub mein bechain hai

hum sabhi aankh munde hue titliyon ke tukka kab be bechain hain

ki shayad andhere mein lipTe hue sabz baghon ke qisse ye nila jazira

kitabon mein danish ki har lauh par ghair mafhum alfaz hain

kai manchale manchalon ke giroh is jazire ke lambe safar par gae aur palaT kar na aae

mera beTa jo soya hua titliyon ke tukka kab be bechain hai

main use bhi safar par gaya aur palaT kar na aata hua dekhta hun

hum ne sadiyon se panw ko hathon ko sinon ko be-dard meKHon se chhalni kiya

aur lahu ki tarah surKH lohe se apni zabanon ko dagha

magar wo jazira pahaDon ki jaanib safar tha

ki chalte to wo dur hi dur jata

Thaharte to jaise wo nazdik aata

yunhi nasl dar nasl hum ne andhere mein lipTe hue in jaziron ki baaten kahin

aur un jhuT ki jhaalron hashiyon ko uThae rakkha

nasl-dar-nasl hum qafila qafila bail kandhe badalte hasin jhuT ki ye saliben uThate rahe

main ki jamid zehanat ka qail nahin

hum ne apne se pahlun ke ilm o farasat ki tashrih o tawil mein apni rag rag se

sari zehanat ko ghaarat kiya

hum ne apne buzurgon ki KHiffat miTane chhupane ki KHatir lahu momyai kiya

kisi ne kaha wo jazira samundar ke is par hai

aur hum nasl-dar-nasl Dubi hui kashtiyan ban gae

kisi ne kaha wo jazira ufuq se pare aaKHiri fasle ke dhoen mein chhupa hai

aur hum qahr sahra mein baraat bardar TuTa hua qafila ban gae

magar wo jazira ajab daldalon ka safar hai

ki sau kos jaen to jaise faqat do qadam hi chale hain

magar wo jazira pahaDon ki jaanib safar hai

ki jaen to wo dur hi dur jae

jo Thahren to jaise wo nazdik aae