safar

ye maanā chand lamhoñ kī rifāqat bhī

bahut hai aaj kal lekin

mire andar kā sannāTā

kabhī dekho to jānoge

ki maiñ kyuuñ

niiñd kī ḳhāmosh tārīkī se Dartā huuñ

ka.ī din se to maiñ ne ḳhvāb bhī

Dar Dar ke dekhe haiñ

jo sannāTe kā aadī ho gayā ho

us ke kānoñ ko

ḳhizāñ meñ peḌ se TuuTe hue

pattoñ ke girte vaqt halkī sī

taḌapne kī sadā bhī achchhī lagtī hai

ye maanā maiñ akelā-pan to apnā

baañT hī lūñgā

magar koī adhūrā-pan mirā bāñTe

to maiñ jānūñ

safar meñ zindagī ke

maiñ ne dekhā hai

agar miltā bhī hai koī

to chupke se kisī ik moḌ par

vo chhoḌ jaatā hai

abhī to ḳhair se

manzil buḌhāpe kī nahīñ aa.ī

abhī to aur bhī kuchh moḌ ā.eñge

buḌhāpe meñ sahāre kī

zarūrat hone lagtī hai

ye milne aur bichhaḌne kī ḳhalish hī

ik sahārā hai

jise dil maan letā hai

vahī hai e'tibār 'āzar'

agar ye bhī nahīñ hogā

to phir ummīd kyā ho

apne jiine kī

ye mana chand lamhon ki rifaqat bhi

bahut hai aaj kal lekin

mere andar ka sannaTa

kabhi dekho to jaanoge

ki main kyun

nind ki KHamosh tariki se Darta hun

kai din se to main ne KHwab bhi

Dar Dar ke dekhe hain

jo sannaTe ka aadi ho gaya ho

us ke kanon ko

KHizan mein peD se TuTe hue

patton ke girte waqt halki si

taDapne ki sada bhi achchhi lagti hai

ye mana main akela-pan to apna

banT hi lunga

magar koi adhura-pan mera banTe

to main jaanun

safar mein zindagi ke

main ne dekha hai

agar milta bhi hai koi

to chupke se kisi ek moD par

wo chhoD jata hai

abhi to KHair se

manzil buDhape ki nahin aai

abhi to aur bhi kuchh moD aaenge

buDhape mein sahaare ki

zarurat hone lagti hai

ye milne aur bichhaDne ki KHalish hi

ek sahaara hai

jise dil man leta hai

wahi hai e'tibar 'azar'

agar ye bhi nahin hoga

to phir ummid kya ho

apne jine ki