safar se lauT aane wali hawa

havā hamāre dālānoñ meñ ruk sī ga.ī hai

tum se ijāzat le kar

maidānoñ kī ḳhushbū phailā degī

mirī kitāboñ aur tumhārī poshākoñ meñ

us se pūchho

kaise haiñ vo log jinheñ pichhlī barsāt meñ

ham ne be-ghar dekhā thā

aur kaisī hai vo bachchī

jis ne ham donoñ ko apne miTTī ke pyāle meñ duudh pilāyā thā

kaise haiñ sūraj-mukhī ke nanhe-munne beTe

jin ko ham ne pyaar kiyā thā

aur vo sāda-lauh charvāhe

jin se ham ne apnā rasta pūchā thā

kaise haiñ dariyā ke giit

jinheñ adhūrā chhoḌ aa.e the

kis ne ham donoñ ke ba.ad unheñ gaayā hai

kaun hamāre ba.ad vahāñ se guzrā

jahāñ november aa kar Thahar gayā thā

aur november dhuup meñ

jaise sayyāhoñ kī vardī pahne

har manzar meñ phail rahā thā

hameñ batāo

tum kaisī ho

aur kaise haiñ zinda rahne vaale zamāne

hawa hamare dalanon mein ruk si gai hai

tum se ijazat le kar

maidanon ki KHushbu phaila degi

meri kitabon aur tumhaari poshakon mein

us se puchho

kaise hain wo log jinhen pichhli barsat mein

hum ne be-ghar dekha tha

aur kaisi hai wo bachchi

jis ne hum donon ko apne miTTi ke pyale mein dudh pilaya tha

kaise hain suraj-mukhi ke nanhe-munne beTe

jin ko hum ne pyar kiya tha

aur wo sada-lauh charwahe

jin se hum ne apna rasta pucha tha

kaise hain dariya ke git

jinhen adhura chhoD aae the

kis ne hum donon ke baad unhen gaya hai

kaun hamare baad wahan se guzra

jahan nowember aa kar Thahar gaya tha

aur nowember dhup mein

jaise sayyahon ki wardi pahne

har manzar mein phail raha tha

hamein batao

tum kaisi ho

aur kaise hain zinda rahne wale zamane