safar

ye aag paanī havā ye miTTī

inhīñ se merā ḳhamīr uTThā

inhīñ meñ tahlīl ho na jā.ūñ

ye aag jo nuur kā lahū hai

jo merī rag rag meñ maujzan hai

isī kī lau meñ ye maiñ ne dekhā

mujhe pahāḌoñ kī choTiyoñ se buland-tar

nuur kī pur-asrār sī ik uñglī bulā rahī thī

maiñ apne bojhal kasīf kapḌoñ ko ḳhuun kī aag meñ jalā kar

havā ke mānind kohsāroñ kī rif.atoñ kī taraf baḌhā

aaj kallā koh par khaḌā huuñ

mire aur angusht-e-nūr ke darmiyān ik jast fāsla hai

aur ab zamīñ kī kashish

jahāñ marg kā sukūñ hai

mire badan ko bulā rahī hai

jo lauT kar dekhtā huuñ

un gahrī tīr-o-tār ghāTiyoñ kī taraf

jahāñ se guzar ke in choTiyoñ pe pahuñchā

to aise lagtā hai

gar maiñ us ḳhāk-dāñ ko lauTā

to phir palaT ke na aa sakūñgā

bas ek hī jast fāsla hai

jo aaj us ko maiñ paar kar luuñ

to abr ban kar baras sakūñ

jis ke āb-pāre

shajar shajar kī numū kareñge

sadaf sadaf meñ guhar baneñge

ye aag pani hawa ye miTTi

inhin se mera KHamir uTTha

inhin mein tahlil ho na jaun

ye aag jo nur ka lahu hai

jo meri rag rag mein maujzan hai

isi ki lau mein ye main ne dekha

mujhe pahaDon ki choTiyon se buland-tar

nur ki pur-asrar si ek ungli bula rahi thi

main apne bojhal kasif kapDon ko KHun ki aag mein jala kar

hawa ke manind kohsaron ki rifaton ki taraf baDha

aaj kalla koh par khaDa hun

mere aur angusht-e-nur ke darmiyan ek jast fasla hai

aur ab zamin ki kashish

jahan marg ka sukun hai

mere badan ko bula rahi hai

jo lauT kar dekhta hun

un gahri tir-o-tar ghaTiyon ki taraf

jahan se guzar ke in choTiyon pe pahuncha

to aise lagta hai

gar main us KHak-dan ko lauTa

to phir palaT ke na aa sakunga

bas ek hi jast fasla hai

jo aaj us ko main par kar lun

to abr ban kar baras sakun

jis ke aab-pare

shajar shajar ki numu karenge

sadaf sadaf mein guhar banenge