safed ghoDe par sawar ajnabi

mire makāñ ke sāmne

vo jūñhī aayā

yak-ba-yak

koī barq zan-zanātī aañkh meñ utar ga.ī

lahū meñ jaise an-ginat

kabūtaroñ kī phaḌphaḌāhaToñ ne sab

ragoñ ke taar jhanjhanā diye

tamām khiḌkiyoñ ke paT

''khaTāk'' se badan ne band kar liye

magar safed ghoḌe par savār ajnabī kī aañkh

mere gird-o-pesh

īstāda jismoñ kī fasīl

toḌ kar

mire sirhāne aa ga.ī

mirī har ek saañs jaise

ḳhanjaroñ kī nok meñ piro ga.ī

na jaane kitnī mehrbān sūrateñ

na jaane kitne bhūle-bisre vāqiye

na jaane kitnī hasratoñ ke qāfile

shikasta kāñch kī tarah

bikhar ga.e

maiñ ik taraf to un ko joḌne

sameTne kī rau meñ mubtalā-e-karb thā

aur dūsrī taraf

hazāroñ ḳhanjaroñ se apnī saañs kī tanāb ko

sambhālne kī had meñ

zaḳhm zaḳhm thā

is ek lamhe meñ hī saarī umr kī

masāfatoñ se bhī tavīl-tar safar adā huā

magar na itnā hausla huā

ki us se ham-kalām ho sakūñ

safed ghoḌe par savār ajnabī

dar-e-makān par khaḌā thā chup magar

mujhe hisār-e-jāñ ke paas bhī

khaḌā dikhā.ī de rahā thā aur maiñ

ek chīḳh rokne kī justujū meñ

sad-hazār chīḳh mujtam.a kiye

āb-e-teġh-e-jism kho chukā thā

aur ek sirf ek surḳh buuñd kā nishān thā

safed ghoḌe par savār ajnabī chalā gayā

mere makan ke samne

wo junhi aaya

yak-ba-yak

koi barq zan-zanati aankh mein utar gai

lahu mein jaise an-ginat

kabutaron ki phaDphaDahaTon ne sab

ragon ke tar jhanjhana diye

tamam khiDkiyon ke paT

khaTak se badan ne band kar liye

magar safed ghoDe par sawar ajnabi ki aankh

mere gird-o-pesh

istada jismon ki fasil

toD kar

mere sirhane aa gai

meri har ek sans jaise

KHanjaron ki nok mein piro gai

na jaane kitni mehrban suraten

na jaane kitne bhule-bisre waqiye

na jaane kitni hasraton ke qafile

shikasta kanch ki tarah

bikhar gae

main ek taraf to un ko joDne

sameTne ki rau mein mubtala-e-karb tha

aur dusri taraf

hazaron KHanjaron se apni sans ki tanab ko

sambhaalne ki had mein

zaKHm zaKHm tha

is ek lamhe mein hi sari umr ki

masafaton se bhi tawil-tar safar ada hua

magar na itna hausla hua

ki us se ham-kalam ho sakun

safed ghoDe par sawar ajnabi

dar-e-makan par khaDa tha chup magar

mujhe hisar-e-jaan ke pas bhi

khaDa dikhai de raha tha aur main

ek chiKH rokne ki justuju mein

sad-hazar chiKH mujtama kiye

aab-e-tegh-e-jism kho chuka tha

aur ek sirf ek surKH bund ka nishan tha

safed ghoDe par sawar ajnabi chala gaya