safir-e-amn

duniyā meñ kaun martā hai apne makāñ se duur

bhaa.ī bahan se biivī se bachchoñ se maañ se duur

hindostāñ kā la.al hai hindostāñ se duur

ye maut kaisī maut hai saare jahāñ se duur

aisī kaḌī thī kis kī nazar tujh ko khā ga.ī

pardes meñ ye kaise tujhe maut aa ga.ī

o jaane vaale dekh tū apne vatan ko dekh

ḳhūn-e-jigar meñ Duube hue mard-o-zan ko dekh

nausha banā ke bhejā thā phūloñ meñ kal tujhe

arthī uThāne aa.e haiñ rādhā kishan ko dekh

kitne hī log aa.e haiñ darshan ke vāste

taa.ir jo mar gayā hai nasheman ke vāste

bartāniya se ruus se jāpān o misr se

har ik safīr phuul chaḌhāne ko aa gayā

lo chūḌiyāñ utaar lalītā bhī aa ga.ī

beTā chitā ko aag lagāne ko aa gayā

chehra nazar jo aayā to chīḳheñ nigal ga.iiñ

lākhoñ chitāeñ jaise kaleje meñ jal ga.iiñ

duniya mein kaun marta hai apne makan se dur

bhai bahan se biwi se bachchon se man se dur

hindostan ka lal hai hindostan se dur

ye maut kaisi maut hai sare jahan se dur

aisi kaDi thi kis ki nazar tujh ko kha gai

pardes mein ye kaise tujhe maut aa gai

o jaane wale dekh tu apne watan ko dekh

KHun-e-jigar mein Dube hue mard-o-zan ko dekh

nausha bana ke bheja tha phulon mein kal tujhe

arthi uThane aae hain radha kishan ko dekh

kitne hi log aae hain darshan ke waste

tair jo mar gaya hai nasheman ke waste

bartaniya se rus se japan o misr se

har ek safir phul chaDhane ko aa gaya

lo chuDiyan utar lalita bhi aa gai

beTa chita ko aag lagane ko aa gaya

chehra nazar jo aaya to chiKHen nigal gain

lakhon chitaen jaise kaleje mein jal gain