safir-e-laila-3

safīr-e-lailā ye kyā huā hai

shaboñ ke chehre bigaḌ ga.e haiñ

diloñ ke dhāge ukhaḌ ga.e haiñ

shafīq aañsū nahīñ bache haiñ ġhamoñ ke lahje badal ga.e haiñ

tumhī batāo ki is khañDar meñ jahāñ pe makḌī kī san.ateñ hoñ

jahāñ samundar hoñ tīrgī ke

siyāh-jāloñ ke bādbāñ hoñ

jahāñ payambar ḳhamosh leTe hoñ bāteñ kartī hoñ murda rūheñ

safīr-e-lailā tumhī batāo jahāñ akelā ho dāstāñ-go

vo dāstāñ-go jise kahānī ke sab zamānoñ pe dastaras ho

shab-e-rifāqat meñ tūl-e-qissa charāġh jalne talak sunā.e

jise zabān-e-hunar kā saudā ho zindagī ko savāl samjhe

vahī akelā ho aur ḳhamoshī hazār sadiyoñ kī saañs roke

vo chup lagī ho ki maut bām-e-falak pe baiThī zamīñ ke saa.e se kāñptī ho

safīr-e-lailā tumhī batāo vo aise dozaḳh se kaise nipTe

dayār-e-lailā se aa.e naame kī nau ibārat ko kaise paḌh le

purāne lafzoñ ke isti.āroñ meñ gum mohabbat ko kyūñke samjhe

safīr-e-lailā abhī malāmat kā vaqt aa.egā dekh lenā

agar musir ho to aao dekho

yahāñ pe baiTho ye naame rakh do

yahīñ pe rakh do inhī siloñ par

ki is jagah par hamārī qurbat ke din mile the

vo din yahīñ par judā hue the inhī siloñ par

aur ab zarā tum nazar uThāo mujhe batāo tumhārā naaqa kahāñ gayā hai

buland Taḳhnoñ se zard retī pe chalne vaalā sabīh naaqa

vo surḳh naaqa savār ho kar tum aa.e jis par burī sarā meñ

vahī ki jis kī mahār bāñdhī thī tum ne bosīda ustuḳhvāñ se

vo asp-e-tāzī ke ustuḳhvāñ the

mujhe batāo safīr-e-lailā kidhar gayā vo

udhar to dekho vo haDDiyoñ kā hujūm dekho

vahī tumhārā aziiz sāthī safar kā monis

pa ab nahīñ hai

aur ab uThāo siloñ se naame

paḌho ibārat jo paḌh sako to

kyā Dar ga.e ho ki sat.h-e-kāġhaz pe juz siyāhī ke kuchh nahīñ hai

ḳhajil ho is par ki kyuuñ ibārat ġhubār ho kar nazar se bhāgī

safīr-e-lailā ye sab karishme isī khañDar ne mirī jabīñ par likhe hue haiñ

yahī ajā.ib haiñ jin ke sadqe yahāñ parinde na dekh pāoge

aur sadiyoñ talak na utregī yaañ savārī

na chob-e-ḳhema gaḌegī yaañ par

safīr-e-lailā ye mere din haiñ

safīr-e-lailā ye merī rāteñ

aur ab batāo ki is aziyyat meñ kis mohabbat ke ḳhvāb dekhūñ

maiñ kin ḳhudāoñ se nuur māñgūñ

magar ye sab kuchh purāne qisse parā.ī bastī ke murda qaziye

tumheñ fasānoñ se kyā lagāo

tumheñ to matlab hai apne naaqa se aur naame kī us ibārat se

sat.h-e-kāġhaz se jo uḌī hai

safīr-e-lailā tumhārā naaqa

maiñ us ke marne par ġham-zada huuñ

tumhāre ranj o alam se vāqif baḌe ḳhasāroñ ko dekhtā huuñ

so aao us kī talāfī kar duuñ ye mere shāne haiñ baiTh jaao

tumheñ ḳharābe kī kārgah se nikāl aa.uuñ

dayār-e-lailā ko jaane vaalī habīb rāhoñ pe chhoḌ aa.uuñ

safir-e-laila ye kya hua hai

shabon ke chehre bigaD gae hain

dilon ke dhage ukhaD gae hain

shafiq aansu nahin bache hain ghamon ke lahje badal gae hain

tumhi batao ki is khanDar mein jahan pe makDi ki sanaten hon

jahan samundar hon tirgi ke

siyah-jalon ke baadban hon

jahan payambar KHamosh leTe hon baaten karti hon murda ruhen

safir-e-laila tumhi batao jahan akela ho dastan-go

wo dastan-go jise kahani ke sab zamanon pe dastaras ho

shab-e-rifaqat mein tul-e-qissa charagh jalne talak sunae

jise zaban-e-hunar ka sauda ho zindagi ko sawal samjhe

wahi akela ho aur KHamoshi hazar sadiyon ki sans roke

wo chup lagi ho ki maut baam-e-falak pe baiThi zamin ke sae se kanpti ho

safir-e-laila tumhi batao wo aise dozaKH se kaise nipTe

dayar-e-laila se aae name ki nau ibarat ko kaise paDh le

purane lafzon ke istiaron mein gum mohabbat ko kyunke samjhe

safir-e-laila abhi malamat ka waqt aaega dekh lena

agar musir ho to aao dekho

yahan pe baiTho ye name rakh do

yahin pe rakh do inhi silon par

ki is jagah par hamari qurbat ke din mile the

wo din yahin par juda hue the inhi silon par

aur ab zara tum nazar uThao mujhe batao tumhaara naqa kahan gaya hai

buland TaKHnon se zard reti pe chalne wala sabih naqa

wo surKH naqa sawar ho kar tum aae jis par buri sara mein

wahi ki jis ki mahaar bandhi thi tum ne bosida ustuKHwan se

wo asp-e-tazi ke ustuKHwan the

mujhe batao safir-e-laila kidhar gaya wo

udhar to dekho wo haDDiyon ka hujum dekho

wahi tumhaara aziz sathi safar ka monis

pa ab nahin hai

aur ab uThao silon se name

paDho ibarat jo paDh sako to

kya Dar gae ho ki sath-e-kaghaz pe juz siyahi ke kuchh nahin hai

KHajil ho is par ki kyun ibarat ghubar ho kar nazar se bhagi

safir-e-laila ye sab karishme isi khanDar ne meri jabin par likhe hue hain

yahi ajaib hain jin ke sadqe yahan parinde na dekh paoge

aur sadiyon talak na utregi yan sawari

na chob-e-KHema gaDegi yan par

safir-e-laila ye mere din hain

safir-e-laila ye meri raaten

aur ab batao ki is aziyyat mein kis mohabbat ke KHwab dekhun

main kin KHudaon se nur mangun

magar ye sab kuchh purane qisse parai basti ke murda qaziye

tumhein fasanon se kya lagao

tumhein to matlab hai apne naqa se aur name ki us ibarat se

sath-e-kaghaz se jo uDi hai

safir-e-laila tumhaara naqa

main us ke marne par gham-zada hun

tumhaare ranj o alam se waqif baDe KHasaron ko dekhta hun

so aao us ki talafi kar dun ye mere shane hain baiTh jao

tumhein KHarabe ki kargah se nikal aaun

dayar-e-laila ko jaane wali habib rahon pe chhoD aaun