sahafi se

qaum kī behtarī kā chhoḌ ḳhayāl

fikr-e-ta.amīr-e-mulk dil se nikāl

terā parcham hai terā dast-e-savāl

be-zamīrī kā aur kyā ho ma.aal

ab qalam se izār-band hī Daal

tañg kar de ġharīb par ye zamīñ

ḳham hī rakh āstān-e-zar pe jabīñ

aib kā daur hai hunar kā nahīñ

aaj husn-e-kamāl ko hai zavāl

ab qalam se izār-band hī Daal

kyuuñ yahāñ sub.h-e-nau kī baat chale

kyuuñ sitam kī siyāh raat Dhale

sab barābar haiñ āsmāñ ke tale

sab ko raj.at-pasand kah kar Taal

ab qalam se izār-band hī Daal

naam se peshtar lagā ke amiir

har musalmān ko banā ke faqīr

qasr-o-aivāñ meñ ho qayām-pazīr

aur ḳhutboñ meñ de 'umar' kī misāl

ab qalam se izār-band hī Daal

āmariyyat kī ham-navā.ī meñ

terā ham-sar nahīñ ḳhudā.ī meñ

bādshāhoñ kī rahnumā.ī meñ

roz islām kā julūs nikāl

ab qalam se izār-band hī Daal

laakh hoñToñ pe dam hamārā ho

aur dil sub.h kā sitārā ho

sāmne maut kā nazārā ho

likh yahī Thiik hai marīz kā haal

ab qalam se izār-band hī Daal

qaum ki behtari ka chhoD KHayal

fikr-e-tamir-e-mulk dil se nikal

tera parcham hai tera dast-e-sawal

be-zamiri ka aur kya ho maal

ab qalam se izar-band hi Dal

tang kar de gharib par ye zamin

KHam hi rakh aastan-e-zar pe jabin

aib ka daur hai hunar ka nahin

aaj husn-e-kamal ko hai zawal

ab qalam se izar-band hi Dal

kyun yahan subh-e-nau ki baat chale

kyun sitam ki siyah raat Dhale

sab barabar hain aasman ke tale

sab ko rajat-pasand kah kar Tal

ab qalam se izar-band hi Dal

nam se peshtar laga ke amir

har musalman ko bana ke faqir

qasr-o-aiwan mein ho qayam-pazir

aur KHutbon mein de 'umar' ki misal

ab qalam se izar-band hi Dal

aamariyyat ki ham-nawai mein

tera ham-sar nahin KHudai mein

baadshahon ki rahnumai mein

roz islam ka julus nikal

ab qalam se izar-band hi Dal

lakh honTon pe dam hamara ho

aur dil subh ka sitara ho

samne maut ka nazara ho

likh yahi Thik hai mariz ka haal

ab qalam se izar-band hi Dal