sahaara

os kī būñdoñ meñ namkīnī nahīñ

phuul gar chāhe ki apnī raat ke anjām ko

ek hī lamhe meñ yaksar jaan le

us ko lāzim hai havā ke sard jhoñke se kahe

jaao us ke āñsuoñ ko chuum lo

āñsuoñ ko chuum kar mahsūs ye hone lagā

ek aañsū ek buuñd

ek pal meñ ek bahr-e-nīlgūñ

ban ke chhā jaatā hai tanhā naav par

kyā huā gar os kī būñdoñ meñ namkīnī nahīñ

os kī būñdoñ meñ namkīnī agar hotī to kyā

phuul is meñ tairte hī tairte

apnī manzil tak pahuñch saktā na thā ik naav ban saktā na thā

phuul kyā hai tū ki maiñ

phuul maiñ huuñ tū nahīñ

tū to bahr-e-nīlgūñ meñ ek tanhā naav hai

bahtī jaatī hai zarā ruktī nahīñ

tujh ko ye ma.alūm kab hai os kī būñdoñ meñ namkīnī nahīñ

tū faqat bātoñ ke bal par apnī rātoñ kī rasīlī chhāñv meñ

ye samajhtī hai ki har lamha achānak phail kar

shash-jihat par dil dhaḌakte hī meñ yuuñ chhāne lagā

jaise ik Thahrāv furqat kī añdherī raat meñ

dard ke ham-dosh lazzat ko bhī uksātā rahe

le piyāla thaam le

is meñ baaqī hai abhī zahr-e-ġham

jis ko pī kar maiñ bhī apnī zindagī se bhāgtā phirtā rahā

guftugū se fā.eda kuchh bhī nahīñ lekin mujhe

har ishārā daam hai alfāz kā

jis meñ taa.ir phaḌ-phaḌāte chīḳhte

chīḳhte hī chīḳhte ḳhāmosh ho jaate hue

jaan lete haiñ ki ab vo raat hī darmāñ banegī dard ke ambār kā

jis ke bikhre dāman-e-sad-chāk meñ

phuul kī bhīgī huī pattī pe būñdeñ os kī

saath laatī haiñ gudāz-e-rūh kī halkī malāhat ko jise

chakh ke kahtī hai zabāñ kyuuñ ab kaho

os kī būñdoñ meñ namkīnī nahīñ

dekh duur

ek tanhā naav bahr-e-nīlgūñ pe rafta rafta baḌhte baḌhte aa rahī hai paas dekh

duur kī chīzeñ bhī yuuñ

bātoñ bātoñ meñ qarīb aa jā.eñgī kyā thī ḳhabar

dekh to

rishta-e-ahd-e-taḳhayyul band thā

khulne lagā

rafta rafta ik na.ī sūrat nazar aane lagī

ik na.ī sūrat magar kuchh naqsh to mānūs haiñ

aur har lamhe se har aañsū se qasr-e-nīlgūñ istāda hai

duur us kī chhat meñ do fānūs haiñ

os ki bundon mein namkini nahin

phul gar chahe ki apni raat ke anjam ko

ek hi lamhe mein yaksar jaan le

us ko lazim hai hawa ke sard jhonke se kahe

jao us ke aansuon ko chum lo

aansuon ko chum kar mahsus ye hone laga

ek aansu ek bund

ek pal mein ek bahr-e-nilgun

ban ke chha jata hai tanha naw par

kya hua gar os ki bundon mein namkini nahin

os ki bundon mein namkini agar hoti to kya

phul is mein tairte hi tairte

apni manzil tak pahunch sakta na tha ek naw ban sakta na tha

phul kya hai tu ki main

phul main hun tu nahin

tu to bahr-e-nilgun mein ek tanha naw hai

bahti jati hai zara rukti nahin

tujh ko ye malum kab hai os ki bundon mein namkini nahin

tu faqat baaton ke bal par apni raaton ki rasili chhanw mein

ye samajhti hai ki har lamha achanak phail kar

shash-jihat par dil dhaDakte hi mein yun chhane laga

jaise ek Thahraw furqat ki andheri raat mein

dard ke ham-dosh lazzat ko bhi uksata rahe

le piyala tham le

is mein baqi hai abhi zahr-e-gham

jis ko pi kar main bhi apni zindagi se bhagta phirta raha

guftugu se faeda kuchh bhi nahin lekin mujhe

har ishaara dam hai alfaz ka

jis mein tair phaD-phaDate chiKHte

chiKHte hi chiKHte KHamosh ho jate hue

jaan lete hain ki ab wo raat hi darman banegi dard ke ambar ka

jis ke bikhre daman-e-sad-chaak mein

phul ki bhigi hui patti pe bunden os ki

sath lati hain gudaz-e-ruh ki halki malahat ko jise

chakh ke kahti hai zaban kyun ab kaho

os ki bundon mein namkini nahin

dekh dur

ek tanha naw bahr-e-nilgun pe rafta rafta baDhte baDhte aa rahi hai pas dekh

dur ki chizen bhi yun

baaton baaton mein qarib aa jaengi kya thi KHabar

dekh to

rishta-e-ahd-e-taKHayyul band tha

khulne laga

rafta rafta ek nai surat nazar aane lagi

ek nai surat magar kuchh naqsh to manus hain

aur har lamhe se har aansu se qasr-e-nilgun istada hai

dur us ki chhat mein do fanus hain