سعیٔ رائیگاں

ذرا نظریں اٹھاؤ

دیکھو سوئے آسماں

ہے کیا سماں دیکھو

رواں ہے یہ امنڈتے بادلوں کا کارواں دیکھو

مگر یہ کیا

ہواؤں میں تپش ہے موجزن کیسی

فضاؤں میں گھٹن کیوں ہے

نہیں یہ بادلوں کا کارواں تو ہو نہیں سکتا

دھواں ہے یہ دھواں دیکھو

ابھرتی ہیں فضاؤں میں

یہ دہشت ناک چیخیں اور فریادیں

فضائیں سہمی سہمی ہیں

ہوائیں مضطرب سی ہیں

یقیناً لگ گئی ہے آگ

ہاں یہ آگ ہی تو ہے

جسے پیہم بجھانے کی ہیں ساری کوششیں جاری

مگر یہ آگ تو بڑھتی ہی جاتی ہے

بہر سو خوف ہے طاری

فضاؤں میں دھوئیں کے ہیں بڑے سفاک مرغولے

کہیں یہ آگ

بڑھ کر آسماں کو ہی نہ اب چھو لے

نہایت کرب میں ڈوبا ہوا ماحول ہے سارا

بجھے گی آگ یہ کیسے

کہ یہ پانی نہیں پٹرول ہے سارا

یہ بڑھتی جا رہی ہے آگ ہر جانب یہاں دیکھو

بجھانے کی یہ سعیٔ رائیگاں دیکھو