sai-e-raegan

zarā nazreñ uThāo

dekho sū-e-asmāñ

hai kyā samāñ dekho

ravāñ hai ye umañDte bādaloñ kā kārvāñ dekho

magar ye kyā

havāoñ meñ tapish hai maujzan kaisī

fazāoñ meñ ghuTan kyoñ hai

nahīñ ye bādaloñ kā kārvāñ to ho nahīñ saktā

dhuāñ hai ye dhuāñ dekho

ubhartī haiñ fazāoñ meñ

ye dahshatnāk chīḳheñ aur fariyādeñ

fazā.eñ sahmī sahmī haiñ

havā.eñ muztarib sī haiñ

yaqīnan lag ga.ī hai aag

haañ ye aag hī to hai

jise paiham bujhāne kī haiñ saarī koshisheñ jaarī

magar ye aag to baḌhtī hī jaatī hai

bahar-sū ḳhauf hai taarī

fazāoñ meñ dhueñ ke haiñ baḌe saffāk marġhūle

kahīñ ye aag

baḌh kar āsmāñ ko hī na ab chhū le

nihāyat karb meñ Duubā huā māhaul hai saarā

bujhegī aag ye kaise

ki ye paanī nahīñ petrol hai saarā

ye baḌhtī jā rahī hai aag har jānib yahāñ dekho

bujhāne kī ye sa.ī-e-rā.egāñ dekho

zara nazren uThao

dekho su-e-asman

hai kya saman dekho

rawan hai ye umanDte baadalon ka karwan dekho

magar ye kya

hawaon mein tapish hai maujzan kaisi

fazaon mein ghuTan kyon hai

nahin ye baadalon ka karwan to ho nahin sakta

dhuan hai ye dhuan dekho

ubharti hain fazaon mein

ye dahshatnak chiKHen aur fariyaaden

fazaen sahmi sahmi hain

hawaen muztarib si hain

yaqinan lag gai hai aag

han ye aag hi to hai

jise paiham bujhane ki hain sari koshishen jari

magar ye aag to baDhti hi jati hai

bahar-su KHauf hai tari

fazaon mein dhuen ke hain baDe saffak marghule

kahin ye aag

baDh kar aasman ko hi na ab chhu le

nihayat karb mein Duba hua mahaul hai sara

bujhegi aag ye kaise

ki ye pani nahin petrol hai sara

ye baDhti ja rahi hai aag har jaanib yahan dekho

bujhane ki ye sai-e-raegan dekho