sailani ruh

maiñ thiraktī huuñ sārangiyoñ kī na.ī jāvedānī dhunoñ par

mire bāblā

terī dhartī tirā ye mohalla kushāda rahe

tere sayyār kī saarī galiyoñ meñ raunaq rahe

tere khaliyān meñ sabz ḳhushbū rahe

tere ashjār par nau-shagufta guloñ kī baje bāñsurī

tū parindoñ kī chahkār se giit buntā rahe

bārishoñ ke tarannum jo mansūḳh hoñ to

tire dasht zarroñ se dariyā baneñ

maiñ to sad-guftanī husn ko dekh kar hī thiraktī rahī

terī bainassutūrī dhunoñ par

zamīñ āsmāñ ke jo mābain haiñ

jo ḳhalāoñ ke uqde zamīnī bashar kholte haiñ

usī fahm kī phailtī vādiyāñ dekh kar

man ke tālāb meñ roz khiltī huī ḳhvāhishoñ ke kañval dekh kar

be-kināra khulī samt se

panchhiyoñ kī uḌānoñ ke

lambī masāfat bhare qāfile dekh kar

maiñ thiraktī rahī

maiñ ḳhudā kī zuhūrī dhunoñ par thiraktī rahī

jo khule pāniyoñ ko

ḳhafī sāhiloñ se muqaffal kare

jo falak-bos parbat ko ism-e-tavāzun se qaa.em kare

khol de dasht par abr ke jo ḳhazāne

jo kaale pahāḌoñ se jharne nikāle

zamīñ par falak se parinde utāre

mohabbat kī un naddiyoñ ke kināre thiraktī rahī

jhiil rattī galī kā khulā bāñkpan ho

yā kailāsh kī raqs kartī huī deviyoñ ke suhāne badan

maiñ thiraktī rahī

naḳhl-e-nūr-o-samar kī ye jalvagarī dekh kar

mushk puurī dhunoñ par thiraktī rahī

main thirakti hun sarangiyon ki nai jawedani dhunon par

mere babla

teri dharti tera ye mohalla kushada rahe

tere sayyar ki sari galiyon mein raunaq rahe

tere khaliyan mein sabz KHushbu rahe

tere ashjar par nau-shagufta gulon ki baje bansuri

tu parindon ki chahkar se git bunta rahe

barishon ke tarannum jo mansuKH hon to

tere dasht zarron se dariya banen

main to sad-guftani husn ko dekh kar hi thirakti rahi

teri bainassuturi dhunon par

zamin aasman ke jo mabain hain

jo KHalaon ke uqde zamini bashar kholte hain

usi fahm ki phailti wadiyan dekh kar

man ke talab mein roz khilti hui KHwahishon ke kanwal dekh kar

be-kinara khuli samt se

panchhiyon ki uDanon ke

lambi masafat bhare qafile dekh kar

main thirakti rahi

main KHuda ki zuhuri dhunon par thirakti rahi

jo khule paniyon ko

KHafi sahilon se muqaffal kare

jo falak-bos parbat ko ism-e-tawazun se qaem kare

khol de dasht par abr ke jo KHazane

jo kale pahaDon se jharne nikale

zamin par falak se parinde utare

mohabbat ki un naddiyon ke kinare thirakti rahi

jhil ratti gali ka khula bankpan ho

ya kailash ki raqs karti hui dewiyon ke suhane badan

main thirakti rahi

naKHl-e-nur-o-samar ki ye jalwagari dekh kar

mushk puri dhunon par thirakti rahi