sajda-e-sahw

log kahte haiñ mūrakh

mulāqāt kā silsila ḳhatm hai

magar apne jiine kā maqsad mulāqāt hai

tum miloge

kabhī aisā rasta bhī ham ko samjhāo

jahāñ tum bhī aao

bahut saañs jhoñkā bahut lafz phūñke

shab-o-roz ke an-ginat zard pattoñ ke

Dheroñ se Dhāñpā kiye

jism apnā

libādoñ kī sūrat bahut ham ne pahnā utārā

bahut manzileñ chhoḌ diiñ

is liye ham na Thahre

ki terī taraf ham ravāna raheñ

magar apnī hijrat kī manzil kabhī aa.egī bhī

ki rasiyā hai tū bhī

faqat hijr kī dāstāñ kā

asātīr kī shakl-o-sūrat meñ

dohrā ke ham ko sunātā rahegā

vahī naġhma-e-soz-o-sāz

silsila-hā-e-dūr-o-darāz

raat ke nau baje the

tire dar pe sar rakh ke sajde meñ royā ki soyā

to sub.h ke nau baj ga.e

raat ko din ke dāman meñ dhoyā

miTā.ī siyāhī bahut qalb-o-jāñ kī

tirī ruuh ke saañs kī hai qasam

jo tū ne kabhī mujh meñ phūñkī

usī naġhma-e-nūr se

apnī hastī ke zarre pirone kī koshish bahut kī

magar ḳhaak meñ bhī to ālūdgī hai

vajūd apne zindāñ se pā.egā kaise najāt

kisī taur mumkin bhī hai

ki ḳhirad ḳhuun aur ḳhaak

ḳhvāhish ḳhayāl aur ḳhvāb

milā deñ mujhe merī miTTī kī ḳhushbū se

ḳhud-kushī kī ka.ī sūratoñ se guzarnā paḌā hai

ḳhudī ko

safar kar ke dekhā ka.ī ālamoñ meñ

sitāroñ se aage

jahānoñ se aage

ḳhudī kī ḳhudā.ī faqat ḳhud-kushī hai

tirī aarzū kī vahī tishnagī hai

yahī tishnagī tere dar se

kahīñ sar uThā de na merā

duā de

agar maiñ huuñ terā

agar tū hai merā

log kahte hain murakh

mulaqat ka silsila KHatm hai

magar apne jine ka maqsad mulaqat hai

tum miloge

kabhi aisa rasta bhi hum ko samjhao

jahan tum bhi aao

bahut sans jhonka bahut lafz phunke

shab-o-roz ke an-ginat zard patton ke

Dheron se Dhanpa kiye

jism apna

libaadon ki surat bahut hum ne pahna utara

bahut manzilen chhoD din

is liye hum na Thahre

ki teri taraf hum rawana rahen

magar apni hijrat ki manzil kabhi aaegi bhi

ki rasiya hai tu bhi

faqat hijr ki dastan ka

asatir ki shakl-o-surat mein

dohra ke hum ko sunata rahega

wahi naghma-e-soz-o-saz

silsila-ha-e-dur-o-daraaz

raat ke nau baje the

tere dar pe sar rakh ke sajde mein roya ki soya

to subh ke nau baj gae

raat ko din ke daman mein dhoya

miTai siyahi bahut qalb-o-jaan ki

teri ruh ke sans ki hai qasam

jo tu ne kabhi mujh mein phunki

usi naghma-e-nur se

apni hasti ke zarre pirone ki koshish bahut ki

magar KHak mein bhi to aaludgi hai

wajud apne zindan se paega kaise najat

kisi taur mumkin bhi hai

ki KHirad KHun aur KHak

KHwahish KHayal aur KHwab

mila den mujhe meri miTTi ki KHushbu se

KHud-kushi ki kai suraton se guzarna paDa hai

KHudi ko

safar kar ke dekha kai aalamon mein

sitaron se aage

jahanon se aage

KHudi ki KHudai faqat KHud-kushi hai

teri aarzu ki wahi tishnagi hai

yahi tishnagi tere dar se

kahin sar uTha de na mera

dua de

agar main hun tera

agar tu hai mera