sakraat maut mein pani ka KHwab

yuuñ mirī qabr banā jaise shabistān-e-nashāt

maut kā jashn manā

farsh-e-shabnam pe bichhā laal gulāboñ kī bisāt

ḳhālī tāqoñ pe sajā zard sharāboñ ke zurūf

vā darīchoñ pe ba-sad nāz-o-adā Tāñkne aa

bhīnī ḳhushbū ke dhanak-rañg harīrī parde

abhī kuchh der Thahar baano abhī daf na bajā

na uThā soī huī kaliyoñ ke ghūñgaT na uThā

maut agar jashn-e-mulāqāt hai aa jashn manā

ik sitāre ko janam de

ik sitāra ki jo us maut kī shab raqs kare

maut aur raqs

niiñd meñ bhīgī huī palkoñ pe bedār jalāl

duur ik jañg-zada dasht meñ tasvīr-e-jamāl

sīna-e-ḳhāk pe kohoñ kā tarāshīda kamāl

aa mirī bāñhoñ meñ lahrā ke chalī aa baano

raushnī bujh ga.ī jalne lage badanoñ ke hisār

duur kāfūr kī ThanDak meñ khaḌe haiñ ashjār

ḳhushk hai merā galā ḳhālī hai paanī kā gilās

apne ashkoñ se mirī pyaas bujhā

aa mirī qabr banā

yun meri qabr bana jaise shabistan-e-nashat

maut ka jashn mana

farsh-e-shabnam pe bichha lal gulabon ki bisat

KHali taqon pe saja zard sharabon ke zuruf

wa darichon pe ba-sad naz-o-ada Tankne aa

bhini KHushbu ke dhanak-rang hariri parde

abhi kuchh der Thahar bano abhi daf na baja

na uTha soi hui kaliyon ke ghungaT na uTha

maut agar jashn-e-mulaqat hai aa jashn mana

ek sitare ko janam de

ek sitara ki jo us maut ki shab raqs kare

maut aur raqs

nind mein bhigi hui palkon pe bedar jalal

dur ek jang-zada dasht mein taswir-e-jamal

sina-e-KHak pe kohon ka tarashida kamal

aa meri banhon mein lahra ke chali aa bano

raushni bujh gai jalne lage badanon ke hisar

dur kafur ki ThanDak mein khaDe hain ashjar

KHushk hai mera gala KHali hai pani ka gilas

apne ashkon se meri pyas bujha

aa meri qabr bana